ఏమి తేల్చకుండా ఏయేటి సమావేశాలు ముగించారు

Posted: 12/19/2013 03:31 PM IST

రాష్ట్ర శాసనసభ ఈ ఏటి సమావేశాలకు మంగళం పాడేశారు. ఏదో ఇరగదీస్తారు... ఏదో చర్చిస్తారనుకుంటే అవేమి చేయకుండానే కోట్లు ఖర్చుచేసి అసెంబ్లీలో గోల గోల చేసి నేటితో సమావేశాలను ముగించారు. తెలంగాణ బిల్లు పై అసెంబ్లీలో చర్చిస్తారనుకుంటే దాని గురించి మాటత్తితేనే అంతెత్తున ఎగిరి నానా రభస చేసి చివరికి సమావేశాలను వాయిదా పడేలా చేశారు.

నేడు ప్రారంభం అయిన అసెంబ్లీ సమావేశం సజావుగా సాగనీయకపోవడంతో స్పీకర్ నాదెండ్ల మనోహర్ ఈ సమావేశాలను వచ్చేసంవత్సరం వరకు వాయిదా వేశారు. మలి దఫా సమావేశాలను 2014 జనవరి 3 తేదీ నుండి 23 వ తేదీ వరకు రెండు విడతలుగా నిర్వహించనున్నట్లు తెలిపారు. తొలి దశ సమావేశాలు జనవరి 3 నుండి 10 తేదీ వరకు , రెండవ దశ సమావేశాలు 16 నుండి 23  వరకు నిర్వహించే షెడ్యూల్ ని ప్రకటించారు. ఈ పదమూడు రోజుల్లో (5, 18,19) తేదీలు సెలవు దినాలు ఉన్నాయి.

అదే విధంగా శాసన మండలిని కూడా జనవరి 3 వరకు వాయిదా వేస్తున్నట్లు శాసనమండలి ఛైర్మెన్ చక్రపాణి ప్రకటన చేశారు. తెలంగాణ అంశం పై ఇరు ప్రాంతాలకు చెందిన నేతలు ఆందోళన కొనసాగించడంతో మండలి కూడా వాయిదాల పర్వం కొనసాగింది. మొత్తానికి ఇన్ని రోజులు కొట్లాటలు, లొల్లి లొల్లిల మధ్య సమావేశాలను ముగించారని ప్రజలు అనుకుంటున్నారు.