రెండు ముళ్లేసి అడ్డం తిరిగిన పెళ్లి కొడుకు

Posted: 05/17/2013 12:49 PM IST

Telugu events bride fight in bridegroom at marriage function

డబ్బు అవసరానికి ఉపయోగపడుతుంది. అదే డబ్బు ఆపదలు కూడా తెచ్చిపెడుతుంది. ఆ డబ్బే ఒక్కసారి నలుగురిలో చావుదెబ్బలు తినమని చెబుతుంది. డబ్బు కోసం మూర్ఖంగా ముందు చూపులేని ఒక పెళ్లి కొడుకుకు వీపు విమానం మోత మోగించింది ఆ పెళ్లి కూతురు. పచ్చని పెళ్లి పందిరిలో పెళ్లికోడుకుకు పెళ్లి కూతురు చేతిలో చావు దెబ్బ తిన్నాడు.

కట్నం ఇచ్చిన తరువాతే తాళికి మూడో ముడి వేస్తానని భీష్మిస్తే.... అందరి ఆడపిల్లలా చీరకొంగును నోట్లో కుక్కుకుని కుమిలిపోలేదు. ఇంట్లోకి పరుగులు తీసి తలుపులు వేసుకోలేదు. మంచానికి అడ్డంగా పడి ఎక్కిఎక్కి ఏడవలేదు. పెద్దల సాక్షిగా పెళ్లి పెటాకు లవుతుంటే తట్టుకోలేకపోయింది. అంతే వరుడి చొక్కాపట్టుకుంది. లెంపలు వాయించింది. దాడికి దిగింది. తమ ఆడబిడ్డ తెగింపునకు బంధువులూ జతకలిశారు.

అంతే పెళ్లి తంతు రణరంగంగా మారింది. వరుడు, అతని తల్లిదండ్రులతో సహా పెళ్లికొచ్చిన పెళ్లికొడుకు తరపువారందరినీ చితక్కొట్టారు. చివరికి ఈ పంచాయతీ పోలీసు స్టేషన్‌కు చేరింది. వరంగల్‌ జిల్లా మంగపేట మండలం కోమటిపల్లి గ్రామానికి చెందిన గార శంకరయ్య, విమల దంపతుల కుమార్తె సృజనను మణుగూరు మండలం పగిడేరు పంచాయతీ కొడిశలకుంట గ్రామానికి చెందిన ఇట్టిమల్ల పిచ్చయ్య, వెంకటమ్మ దంపతుల కుమారుడు ప్రశాంత్‌తో వివాహం చేసేందుకు అన్ని ఏర్పాట్లు చేశారు.

కొడిశలకుంట గ్రామంలోని ఓ ప్రార్థనామందిరంలో పెళ్లి వేడుక ఆరంభమైంది. మాంగళ్య ధారణ జరుగుతున్న సమయంలో తమకు ఇస్తామన్న రూ.20వేలు నగదును వరుడి బంధువులు అడిగారు. త్వరలోనే ఇస్తామని పెళ్లిని ఆపొద్దని వధువు తల్లిదండ్రులు బతిమిలాడారు. కాళ్లు పట్టుకున్నారు. వరుడు మాత్రం తాళికట్టటానికి ససేమిరా అన్నాడు.

దీనికి తోడు వరుడి తరపున వధువుకు పట్టీలు, దిద్దులు సమర్పించలేదు. దీంతో అటు పెళ్లికొడుకు, ఇటు వధువు బంధువుల మధ్య వివాదం జరిగింది. ఆగ్రహావేశాలతో ఇరువర్గాల దాడికి దిగాయి. మూడు ముళ్ల బంధం మధ్యలోనే ఆగిపోయింది. దీంతో వధువు కోపంతో వరుడు ప్రశాంత్‌పై దాడికి దిగింది.