లొంగిపోనున్న సంజయ్‌దత్

Posted: 05/16/2013 11:19 AM IST

1993 ముంబై బాంబు పేలుళ్ల కేసులో దోషిగా తేలిన బాలీవుడ్ నటుడు సంజయ్‌దత్ టాడా కోర్టు ఎదుట లొంగిపోనున్నారు. పుణె ఎరవాడ జైలులో లొంగిపోయేందుకు అనుమతి ఇవ్వాలంటూ దాఖలు చేసిన పిటిషన్‌ను సంజయ్‌దత్ ఉపసంహరించుకున్నారు. ఈరోజు సాయంత్రం 4 గంటలకు సంజయ్‌దత్ ముంబైలోని టాడా కోర్టులో లొంగిపోయే అవకాశాలున్నాయి. ఈ కేసులో సంజయ్‌దత్‌కు ఐదేళ్ల జైలు శిక్ష పడిన విషయం తెలిసిందే. ఇప్పటికే ఏడాదిన్నర కాలం జైలు జీవితం గడిపిన సంజయ్‌దత్ మరో మూడున్నరేళ్ల జైలు శిక్ష అనుభవించాల్సి ఉంది. సంజయ్ కోర్టులో లొంగిపోవడానికి సుపీంకోర్టు నాలుగు వారాల సమయం ఇచ్చింది. ఈ గడువు 16వ తేదీతో ముగియనుంది. సినిమా షూటింగ్‌ల కారణంగా లొంగిపోయేందుకు మరింత సమయం ఇవ్వాలన్న సినీ నిర్మాతల విజ్ఞప్తిని సైతం సుప్రీంకోర్టు తోసిపుచ్చింది. ఈ నేపథ్యంలో ముంబైలో స్వార్థ శక్తులు, మతఛాందసవాద గ్రూపుల నుంచి తనకు ప్రాణహాని ఉందని, అందువల్ల పుణెలోని ఎరవాడ జైలులో లొంగిపోయేందుకు అనుమతి ఇవ్వాలని స్పెషల్ టాడా కోర్టులో సంజయ్‌దత్ పిటిషన్ వేశారు.