మావో మనుమరాలి ఆస్తి రూ.4,428 కోట్లు

Posted: 05/10/2013 01:47 PM IST

పీపుల్స్ రిపబ్లిక్ పార్టీ వ్యవస్థాపకుడు మావో జెడాంగ్ మనుమరాలే ఇప్పుడు కమ్యూనిస్టు చైనాలోని అత్యంత ధనవంతుల జాబితాలో చోటు దక్కించుకోవడం చర్చనీయాంశమైంది. మావో మనుమరాలు కాంగ్ డొంగ్మై, ఆమె భర్త చెన్ డాంగ్‌షెంగ్‌లతో పాటు మావో మూడో భార్య హీ జిజెన్‌ల మొత్తం ఉమ్మడి సంపద సుమారు రూ.4,428 కోట్లు ఉన్నట్లు ‘సౌత్ చైనా మార్నింగ్ పోస్టు’ పత్రిక వెల్లడించింది. గౌంగ్‌డాంగ్ కేంద్ర స్థానంగా వెలువడే ‘న్యూ ఫార్చూన్’ మ్యాగజైన్ ఏటా ప్రకటించే చైనాలోని అత్యంత ధనవంతుల జాబితాలో కాంగ్ డొంగ్మై 242వ స్థానంలో నిలిచారు.

ఆమె భర్త చెన్ చైనాలో తొలి వేలం సంస్థ ‘గార్డియన్’తో పాటు దేశంలో నాలుగో అతిపెద్ద బీమా సంస్థ ‘తైకాంగ్’ వ్యవస్థాపకుడు కావడం విశేషం. 1999లో పెన్సిల్వేనియా యూనివర్సిటీ నుంచి మాస్టర్ డిగ్రీ సాధించిన కాంగ్... బీజింగ్‌లో ఓ సాంస్కృతిక సంస్థతో పాటు అనుబంధంగా బుక్‌హౌస్‌ను నిర్వహిస్తున్నారు. అవి సామ్యవాద సంస్కృతి పరిరక్షణ లక్ష్యంతో పనిచేస్తున్నాయి. అంతేకాదు మావోపై కాంగ్ రచించిన నాలుగు పుస్తకాలు అత్యధికంగా అమ్ముడుపోయాయి. అందుకే కాంగ్ తన తాత మావో పేరునే మూలధనంగా మార్చుకున్నారని సౌత్ చైనా మార్నింగ్ పోస్టు వ్యాఖ్యానించింది.