మంత్రిగారి మజాకా!

Posted: 05/10/2013 01:51 PM IST

సొంత జిల్లా పై ఆ మంత్రి గారికి జోరు పెరిగింది. ఒక పక్క అవినీతి పాల్పాడిన మంత్రి అనే పేరు ఉంది. అయిన ఆయన మాత్రం మారలేదు. మంత్రిగారి పై అవినీతి మరకలు పోకముందే.. మరో విచిత్రమైన పని చేసి మంత్రా మజాకా అనిపించుకున్నారు. కేవలం మూడు రోజుల్లో 119 కిలోమీటర్ల రోడ్లను పంచాయతీరాజ్ శాఖ నుంచి ఆర్అండ్‌బీ శాఖకు బదిలీ చేయించుకొని.. 'మంత్రా.. మజాకా!' అనిపించుకున్నారు రోడ్లు, భవనాల ఆర్అండ్‌బీ శాఖ మంత్రి ధర్మాన ప్రసాదరావు. "పంచాయతీరాజ్ శాఖకు చెందిన రోడ్లను ఆర్అండ్‌బీకి బదిలీ చేయవద్ద''ని ఒకవైపు ఆయన శాఖ అధికారులు ప్రభుత్వానికి మొర పెడుతుండగా,

మరోవైపు ఆయనే తన సొంత జిల్లా శ్రీకాకుళంలో అనేక రోడ్లను ఆర్అండ్‌బీలోకి మార్పిస్తున్న వైనం విస్మయానికి గురిచేస్తోంది. 'పంచాయతీ రోడ్ల' బదిలీ అంశంపై రెండుసార్లు సీఎం కిరణ్ సమక్షంలో జరిగిన ఆర్అండ్‌బీ శాఖ సమీక్షా సమావేశం చర్చించింది. ఈ 'బదిలీ'ని నిలిపివేయాలని శాఖ ఉన్నతాధికారులు ధర్మాన ఎదుటే గట్టిగా వాదించారు. కానీ ఫలితం లేకపోగా మంత్రి జిల్లా నుంచే రోడ్ల బదిలీ సాగిపోతున్నది. రెండురోజుల క్రితం శ్రీకాకుళం జిల్లాకు చెందిన 7 రోడ్లను ఆర్అండ్‌బీకి బదిలీచేశారు. వీటి నిడివి 51 కిలోమీటర్లు. అదే జిల్లాలో మరో 11 రహదారులను బదిలీ చేశారు. వీటి నిడివి 68 కిలోమీటర్లు. ఇలా మూడురోజుల్లోనే 119 కిలోమీటర్ల పంచాయతీరాజ్ రోడ్లు ఆర్అండ్‌బీ పరిధిలోకి వచ్చి చేరాయి.