‘శారద’ కుటుంబాల్లో విషాదం?

Posted: 05/07/2013 08:36 AM IST

పశ్చిమబెంగాల్‌లో శారద కుంభకోణం పలు కుటుంబాల్లో విషాదాన్ని నింపుతోంది. ఇప్పటికే దీనివల్ల ఎనిమిది మంది ఆత్మహత్యలు చేసుకొని ప్రాణాలు కోల్పోగా, ఈ చిట్‌కంపెనీతో సంబంధం ఉన్న ఓ వ్యక్తి హత్యకు గురయ్యాడు. హూగ్లీ జిల్లాలోని చుంచ్వారాకు సమీపంలో హలో ఇండియా చిట్ ఫండ్ కంపెనీ డైరెక్టర్ జయంత సర్కార్ (48) దారుణ హత్యకు గురయ్యాడు. డిపాజిట్ చేసిన వ్యక్తులే ఈ దాడి చేసి ఉంటారని పోలీసులు అనుమానం వ్యక్తం చేస్తున్నారు. సర్కార్ భార్య పాపియా సర్కార్ వేర్వేరు ప్రాంతాలకు చెందిన అభిజిత్ సహా, అబ్దుల్లా రషీద్, బిప్‌ల్యాబ్ బిశ్వాస్ అనే ముగ్గురు వ్యక్తులే ఈ పనిచేసి ఉంటారని పోలీసులకు ఫిర్యాదు చేశారు. అంతకు ముందు బిధాన్ రాయ్ అనే శారద చిట్ ఫండ్ కంపెనీ ఏజెంట్ తండ్రి జగదీష్‌రాయ్(60) ఆత్మహత్యకు పాల్పడ్డారు. ఉత్తర 24 పరగణా జిల్లాలో ఈ ఘటన జరిగింది. డిపాజిట్ దారులకు తన కుమారుడికి డబ్బులు చెల్లించే స్తోమత లేకపోవడంతో తీవ్ర ఒత్తిడికిలోనై ఆత్మహత్య చేసుకున్నాడు. దీంతో ఈ స్కాం వల్ల ప్రాణాలు కోల్పోయినవారి సంఖ్య ఎనిమిదికి చేరింది.