Posted: 03/06/2013 06:54 PM IST

తెలంగాణపై కేంద్ర మంత్రి వయలార్ రవి చేసిన వ్యాఖ్యల్లో తప్పేముందని ప్రభుత్వ విప్ తూర్పు జయప్రకాశ్ రెడ్డి ప్రశ్నించారు. 50 ఏళ్లుగా నలుగుతున్న సమస్యను ఇప్పటికిప్పుడు .. అంతత్వరగా తేల్చేయలేరన్న ఉద్దేశంతోనే వయలార్ మాట్లాడారని అన్నారు. మెదక్ జిల్లాలోని ఒక ప్రైవేటు రిసార్ట్స్ వద్ద ఆయన మాట్లాడారు. మూడు ప్రాంతాల నేతల అభిప్రాయాలను పరిగణనలోకి తీసుకుని వారితో చర్చించి పరిష్కరించాల్సిన సున్నితమైన అంశమని అన్నారు. కాని .. టీఆర్ఎస్ నేతలు కేవలం రాజకీయం చేయడం కోసమే మాట్లాడుతున్నారని ఆగ్రహం వ్యక్తం చేశారు. రాజకీయ ఎదుగుదల కోసమే తెలంగాణ వాదాన్ని టీఆర్ఎస్ నేతలు ఉపయోగించుకుంటున్నారని ఆరోపించారు. ముఖ్యమంత్రి కిరణ్‌కు దమ్ములేకే దూరంగా స్థాయీ సంఘాల అవగాహనా సదస్సును పెట్టారని హరీశ్ వ్యాఖ్యానించారంటూ మీడియా ప్రతినిధులు ప్రశ్నించినప్పుడు .. "వాడెవడు సీఎం కిరణ్‌కు దమ్మూ ధైర్యం లేదని అనేందుకు. ఆయన ఏవిధంగా శాంతి భద్రతలను కంట్రోల్ చేస్తున్నాడో అందరికీ తెలుసు. ఆయన్ను విమర్శించే అర్హత హరీశ్ రావుకు లేదు. రాజకీయ అవసరాల కోసమే తెలంగాణ వాదాన్ని ఉపయోగించుకుంటున్నారు'' అని ఆగ్రహం వ్యక్తం చేశారు.