Posted: 02/20/2013 11:16 AM IST

     అగస్టా హెలికాప్టర్ల కొనుగోలు విషయంలో తప్పైతే జరిగింది.  దాని మూలాల్లోకి పోయి కనిపెడతాం అంటారు రక్షణ మంత్రి ఎ.కె.ఆంటోనీ.  రాజీనామానా ఛీఛీ అలాంటిదేమీ లేదంటారాయన.  అగస్టా కోనుగోళ్ళకి సంబంధించిన ఒప్పందం మీద పార్లమెంటులో చర్చకు తాము సిద్ధమేనని ఆయన ధీమాను వ్యక్తం చేసారు.  వైమానిక దళం, రక్షణ శాఖ, ఎస్పీజీ (స్పెషల్ ప్రొటెక్షన్ గ్రూప్) అంతా కలిస కట్టుగా పకడ్బందీగా పనిచేసి, ఆరు కంపెనీల వరకూ బ్లాక్ లిస్ట్ లో పెట్టి ఇంత జాగ్రత్తగా వ్యవహరిస్తే ఇదెలా జరిగింది చెప్మా అంటూ ఆంటోనీ ఆశ్చర్యాన్ని దాచుకోకుండా బయటకు ప్రదర్శించారు. 

     అవసరమైన షోకాజ్ నోటీసులను ఇచ్చామని, వాటికి వివరణలు రావలసివుందని, సిబిఐ బృందం ఇటలీ నుంచి రావటం తోనే చట్ట పరిధిలో చర్యలు ప్రారంభిస్తామని ఆంటోనీ అన్నారు.     అగస్టాలో మధ్యవర్తిగా వ్యవహరించిన గూడో, రఫేల్ ఒప్పందంలో కూడా మధ్యవర్తియే కదా మరి ఆ ఒప్పందాన్ని కూడా రద్దు చేస్తారా అని అడిగిన ప్రశ్నకు, ఆంటోనీ, ఇంకా చర్చల దశలో ఉన్న దానిగురించి తొందరపాటుగా మాట్లాడకూడదని అన్నారు.  అయితే, దోషులను మాత్రం వదిలిపెట్టమని హామీ ఇచ్చారు.  ఇటలీ ప్రభుత్వం వారు అవసరమైన వివరాలను ఇప్పటికే ఇచ్చివున్నారని కూడా ఆంటోనీ చెప్పారు. 

-శ్రీజ