Posted: 02/19/2013 09:31 AM IST

     అలుపెరుగని రాజకీయ పార్టీ ప్రచారాలకు తాత్కాలికంగా బ్రేక్ పడింది.  తెలుగు దేశం పార్టీ అధినేత చంద్రబాబు చేస్తున్న వస్తున్నా మీకోసం, షర్మిలా చేస్తున్న మరో ప్రజా ప్రస్థానం రెండూ రెండు రోజుల పాటు నిలిచిపోయాయి.  కారణం ఎన్నికల కోడ్.  నియమావళి.  గుంటూరు, కృష్ణా జిల్లాలలో జరుగనున్న పట్టభద్రుల ఎమ్మెల్సీ ఎన్నికల మూలంగా ఈ రోజు సాయంత్రం 5 గంటల నుంచి చంద్రబాబు పాదయాత్రను నిలిపివేయవలసిందిగా ఎన్నికల కమిషన్ ఆంక్షలు విధించింది.  అంతే కాదు, ఇతర జిల్లాలకు చెందిన నాయకులు ఎన్నికలు జరుగుతున్న జిల్లాల్లో ఉండటానికి వీల్లేదని,  చంద్రబాబు గుంటూరులో ఉన్నా పరవాలేదు కానీ, ఆయన బస చేస్తున్న ఇంటి నుంచి బయటకు కదలకూడదని, ఇతర నాయకులను కలవకూడదని కూడా షరతులు విధించింది.  వీడియోతో ఎప్పటికప్పుడు కదలికల మీద నిఘా ఉంటుందని కూడా వెల్లడించింది.  దానితో, రైతులను కలిసి, వారికి కలిగిన పంట నష్టం విషయంలో పరామర్శిద్దామనుకున్న చంద్రబాబు ప్రణాళికలో అంతరాయం ఏర్పడింది. 

     ఇక నల్గొండ, వరంగల్, ఖమ్మం జిల్లాలలో ఎటువంటి రాజకీయ సమావేశాలూ, ప్రసంగాలూ ఉండకూడదని ఆ జిల్లాల్లోని ఉపాధ్యాయ ఎమ్ఎల్సి ఎన్నికల సందర్భంగా ఆ ప్రాంతాలలో పర్యటిస్తున్న షర్మిల కు ఎన్నికల కమిషన్ తెలియజేసింది.  అందువలన షర్మిల ఈ రోజు మధ్యాహ్నం నుంచి 21 సాయంత్రం వరకూ పాదయాత్రలకు బ్రేక్ ఇవ్వవలసిందే.