Posted: 02/12/2013 05:11 PM IST

భారత పార్లమెంట్ దాడి కేసులో దోషి అప్జల్ గురు ఉరితీత విషయంపై కేంద్రం పంపిన లేఖ రెండు రోజుల తర్వాతే అంటే సోమవారం ఉదయం అఫ్జల్ కుటుంబానికి చేరింది. అఫ్జల్ గురు ఉరి శిక్ష అమలుపై అతని కుటుంబానికి సమాచారమిస్తూ కేంద్ర హోంశాఖ ఓ లేఖను అఫ్జల్ కుటుంబానికి పంపించింది.  వాస్తవానికి అఫ్జల్‌ను శనివారం ఉదయం తీహార్ జైలులో ఉరి తీసిన సంగతి తెలిసిందే. అఫ్జల్ ఉరితీత విషయం అస్సలు మాకు తెలియదని, కేంద్రం లేఖ ద్వారా సమాచారం అందజేయలేదని అతని కుటుంబీకులు వాపోయారు.

అప్జల్ గురు ఉరితీతను అధికారులు స్పీడ్ పోస్ట్ చేసినా, అతని కుటుంబానికి అది సోమవారమే చేరడం గమనార్హం.  అయితే అప్జల్  గురు బాడీని తమకు అప్పగించాలని  అతని కుటుంబసభ్యులు  ప్రభుత్వాన్ని  కోరుతున్నారు.  అప్జల్  బాడీని అప్పగిస్తే  అతని అంత్యక్రియలు  సరైన  రీతిలో  నిర్వహిస్తామని, అదొక్కటే తమ డిమాండని  వారు  పేర్కొన్నారు.  ఈ మేరకు  అతని కుటుంబం  తీహార్ జైలు అధికారులకు లేఖ రాసిందని  అప్జల్ బంధువు యాసిన్ పేర్కొన్నారు.