Posted: 01/30/2013 04:07 PM IST

ఉద్యాన శాఖ మంత్రి రాంరెడ్డి వెంకటరెడ్డికి హైకోర్టు షాక్‌ ఇచ్చింది. మంత్రికి 35 లక్షల రూపాయలు ముట్టజెప్పామని ఖమ్మం జిల్లా ఏన్కూరులోని శ్రీచైతన్య టెక్నో స్కూల్ యాజమాన్యం హైకోర్టుకు ఎక్కిన విషయం తెలిసిందే. దీనిపై శ్రీచైతన్య టెక్నో స్కూల్ కరస్పాండెంట్ గుగులోత్ చిన్నా, ప్రధానోపాధ్యాయుడు వి. రమేష్ హైకోర్టును ఆశ్రయించారు. తన స్కూల్‌ సజావుగా నడిచేలా చూసేందుకు మంత్రికి 35 లక్షల లంచం ఇచ్చినట్లు గుగులోత్ చిన్నా న్యాయస్థానం ఎదుట వెల్లడించారు. ప్రస్తుతం తనకు ఖమ్మంలో రక్షణ లేకుండా పోయిందని ఆయన కోర్టుకు విన్నవించుకున్నారు. ఈ వ్యవహారంపై దర్యాప్తు చేపట్టాలని వరంగల్ ఎస్పీని హైకోర్టు ఆదేశించింది. ఫిబ్రవరి 4లోపు డీఎస్పీ స్థాయి అధికారిని దర్యాప్తు అధికారిగా నియమించి అనంతరం 15 రోజుల్లోపు నివేదిక అందచేయాలని న్యాయస్థానం స్పష్టమైన ఆదేశాలు ఇచ్చింది.