Posted: 10/10/2012 12:42 PM IST

విశాఖ ఏజెన్సీలోని పర్యాటక శాఖ యూనిట్లలో పనిచేస్తున్న టూరిజం కార్మికులు సమ్మెబాట పట్టారు. తమ సమస్యల పరిష్కారంలో పర్యాటక శాఖ యాజమాన్యం నిర్లక్ష్య వైఖరిని నిరసిస్తూ కార్మికులు ఈ నెల 10 నుంచి సమ్మెకు పిలుపునిచ్చిన విషయం తెలిసిందే. పర్యాటక శాఖ అధికారులు ఈ నెల 15 నుంచి 21 వరకు నిర్వహించనున్న అరకు ఉత్సవ్‌ను దృష్టిలో పెట్టుకుని సమ్మెను విరమించాలని కోరినప్పటికీ పట్టువీడని కార్మికులు నేటి నుంచి సమ్మెకు దిగారు. కార్మికులు సమ్మెకు దిగటంతో ఈరోజు ఉదయం నుంచి అరకులోయ, అనంతగిరి మండలాల్లోని అయిదు పర్యాటక యూనిట్లతో పాటు బొర్రా గుహలు మూతపడ్డాయి. అలాగే అరకులోయ సందర్శించే పర్యాటకులు, అతిథి గృహాలకు సేవలు నిలిచిపోయాయి. కాగా సమ్మె ప్రభావం అరకు ఉత్సవ్ నిర్వహణపై కూడా పడే అవకాశం ఉంది. తమ డిమాండ్లను వెంటనే పరిష్కరించకపోతే 2 నెల 18 నుంచి  రాష్ట్రవ్యాప్తంగా సమ్మె చేస్తామని వారు హెచ్చరించారు.