Posted: 10/03/2012 12:20 PM IST

తెలంగాణ ఏర్పాటుకు అడ్డుగా ఉన్న ముఖ్యమంత్రి కిరణ్‌కుమార్‌కి తెలంగాణ మంత్రులు డబ్బా కొడుతూ భజన చేస్తున్నారని సిద్దిపేట ఎమ్మెల్యే హరీశ్‌రావు విమర్శించారు. మెదక్ జిల్లా చేగుంట మండలం చిన్నశివునూర్‌లో మెతుకు శ్రీనివాస్ ఏర్పాటుచేసిన మహాత్మగాంధీ, అంబేద్కర్ విగ్రహాలను హరీశ్‌రావు ఆవిష్కరించారు. అనంతరం జరిగిన సభలో ఆయన మాట్లాడారు. ముఖ్యమంత్రి తెలంగాణ ద్రోహి అని ఎంపీ పొన్నం ప్రభాకర్ విమర్శిస్తే తెలంగాణ మంత్రులు, ఎమ్మెల్యే మాత్రం ము ఖ్యమంత్రిని పొగుడుతున్నారని, పొన్నంను విమర్శిస్తున్నారని ఆయన పేర్కొన్నారు. జిల్లాకు చెందిన ఓ మంత్రి ముఖ్యమంత్రి కృషి వల్లనే హైదరాబాద్ ఫ్రీజోన్ నుంచి తప్పించారని, మరో మంత్రి ప్రాణహిత చేవెళ్లకు అనుమతి తీసుకొచ్చాడని గొప్పలు చెబుతున్నారన్నారు. హైదరాబాద్ ఫ్రీజోన్ కాదని, ఆరవజోన్‌లో అంతర్భాగమని, ఎస్ఐ పరీక్షల కోసమే ముఖ్యమంత్రి ఫ్రీజోన్‌పై ఉత్తరం రాశాడని పేర్కొన్నారు. ఫ్రీజోన్ అయితే రద్దయింది కాని అమలులోకి రాలేదు. తెలంగాణ ప్రాంత, ఎస్ఐ, సీఐలకు ప్రమోషన్లు సైతం రాలేదు. తెలంగాణ ప్రాంతంలో పని చేస్తున్న ఆంధ్ర ప్రాంత అధికార్లను ఎంతమందిని తిప్పిపంపారో వెల్లడించాలని హరీశ్‌రావు డిమాండ్ చేశారు. ప్రాణహిత, చేవెళ్లకు అనుమతి కోసం మహారాష్ట్ర ప్రభుత్వంతో ఒప్పందం జరిగిందన్న మంత్రులు ప్రాజెక్టును ఎందుకు ప్రారంభించడం లేదన్నారు.