Posted: 07/11/2012 01:33 PM IST

      గాలి జనార్ధన్ రెడ్డి బెయిల్ కేసులో మధ్యవర్తిత్వం వహించిన నాచారం రౌడీషీటర్ యాదగిరిరావు ఏసీబీ విచారణలో ఆసక్తికర విషయాలను బయట పెట్టాడు. మాజీ ఓఎస్ డీగా సర్వేశ్వర్ రెడ్డి ఎస్ఐగా ఉన్నప్పటి నుంచే తనకు పరిచయమని యాదగిరి తెలిపాడు. ఆ పరిచయంతోనే పోలీస్ డిపార్ట్ మెంటులో ఇతర ఉద్యోగులతో పరిచయం పెంచుకున్నట్లు వెల్లడించాడు. రియల్ ఎస్టేట్ వ్యాపారంలో కూడా పోలీస్ ఉన్నత అధికారులను ఉపయోగించుకున్నట్లు తెలిపాడు. సర్వేశ్వర్ రెడ్డి బెయిల్ మంజూరు కోసం జడ్జి పట్టాభికి 10 లక్షలు ఇచ్చినట్లు యాదగిరి చెప్పాడు. గాలి జనార్ధన్ రెడ్డి బెయిలు మంజూరు విషయంలో ఆయన సోదరుడు సోమశేఖర్ రెడ్డితో పరిచయం ఏర్పడిందని యాదగిరి చెప్పాడు. జూనియర్ న్యాయవాది ఆదిత్య సోమశేఖరరెడ్డిని తనకు పరిచయం చేసినట్లు ఏసీబీకి ఇచ్చిన వాంగ్మూలంలో యాదగిరి వెల్లడించాడు. మరోవైపు ఈ వ్యవహారంలో తనకు ఎంత మొత్తం ముట్టింది.. ఎవరెవరికి ఎంత మొత్తం ఇచ్చింది కూడా యాదగిరి వెల్లడించాడు.
     గాలికి బెయిల్ రావడంతో తనకు రెండునర్న కోట్ల రూపాయలు అందినట్టు యాదగిరి ఒప్పుకున్నాడు. ఈ మొత్తంలో చలపతిరావు, జూనియర్ న్యాయవాది ఆదిత్యలకు కోటి రూపాయలు, నక్క సాయిబాబ అనే ఉద్యోగికి 36 లక్షలు, అనారోగ్యంతో బాధపడుతున్న తన బంధువు వెంకటేశ్ కు 12 లక్షలు, శరత్ కుమార్ కు 10 లక్షలు ఇచ్చినట్లు వాంగ్మూలంలో యాదగిరి అంగీకరించాడు. మరోవైపు 20లక్షలతో నాచారంలో ఓ ప్లాట్, 8 లక్షలు పెట్టి స్విఫ్ట్ కారు కొన్నట్టు యాదగిరిరావు అంగీకరించాడు. గాలి బెయిలు వ్యవహారం బయటికి పొక్కిన తర్వాత తాను ఏయే ప్రాంతాల్లో తిరిగిన విషయాన్ని యాదగిరి తెలిపాడు. చెన్నై, మధురై, తిరువనంతపురం, కన్యాకుమారి, మద్రాస్, మైసూర్, బెంగళూరు నగరాల్లో తలదాచుకున్నట్లు ఏసీబీ విచారణలో వెల్లడించాడు. ఈ బెయిల్ వ్యవహారంలో అరెస్టుల పరంపర కొనసాగుతోంది. రావి ప్రకాశ్ అనే వ్యాపారిని పోలీసులు అదుపులోకి తీసుకున్నారు. ప్రకాశ్ ప్రమేయం గురించి పోలీసులు విచారిస్తున్నారు.

...avnk