Posted: 07/08/2012 04:30 PM IST

       ఉత్తరప్రదేశ్ యువ ముఖ్యమంత్రి అఖిలేష్ యాదవ్ కు వరుస ఆటుపోట్లు తప్పడం లేదు. సొంత పార్టీ నేతలతో పాటు ప్రతిపక్షాలను కూడా తనవైపు తిప్పుకునేందుకు అఖిలేష్ ఇటీవల అసెంబ్లీలో ప్రకటించిన కార్ల నజరానా యత్నం బెడిసికొట్టింది. నియోజకవర్గాల అభివృద్ధి నిధుల నుంచి 20 లక్షలు విలువైన కార్లను ఎమ్మెల్యేలు కొనుగోలు చేసుకోవచ్చంటూ అఖిలేష్ ఆర్భాటంగానే ప్రకటించారు. ప్రజాధనాన్ని దుర్వినియోగం చేస్తున్నారంటూ విపక్ష నేతలు భగ్గుమనడంతో ఆ ప్రతిపాదనను అఖిలేష్ వెంటనే ఉపసహరించుకున్నారు. తాజాగా అఖిలేష్ డ్రీమ్ ప్రాజెక్ట్ అయిన లయన్ సఫారీకి కేంద్ర పర్యావరణ మంత్రిత్వ శాఖ మోకాలడ్డింది. తక్షణం ఈ ప్రాజెక్టును ఆపేయాలంటూ రాష్ట్ర ప్రభుత్వానికి నోటీసులు పంపింది. పదిహేను రోజుల్లోగా సమాధానం ఇవ్నాలని పేర్కొంది. ఈ ఏడాది మార్చిలో అధికారంలోకి వచ్చిన సమాజ్ వాది పార్టీ గత నెలలో 35 కోట్ల రూపాయలతో లయన్ సఫారీ ప్రాజెక్ట్ ను ముందుకు తీసుకువెళ్లాలని నిశ్చయించుకుంది. ఇందుకోసం ములాయం కంచుకోటైన ఇటావాలోని 50ఎకరాల్లో ఈ ప్రాజెక్ట్ ను డవలప్ చేయాలని సంకల్పించుకుంది.
   దేశవ్యాప్తంగా ఉన్న సింహాలను ఈ సఫారికి రప్పించి పర్యాటకుల ఆకర్షించాలన్నది యూపీ ప్రభుత్వం ఆలోచన. అయితే ఈ ప్రాజెక్టుపై పర్యావరణవేత్తల నుంచి సైతం తీవ్ర అభ్యంతరాలు వ్యక్తమయ్యాయి. సింహాలను బయట నుంచి తెచ్చేబదులు ఇటావా చుట్టుపక్కల ఉన్న వందలాది కొంగలు, మొసళ్ల సంరక్షణ చేపడితే మంచిదని కూడా వారు సూచిసున్నారు.

...avnk