Posted: 07/07/2012 03:36 PM IST

దివంగత ముఖ్యమంత్రి వైయస్ రాజశేఖర్ రెడ్డి ముఖ్యమంత్రిగా ఉన్న సయమంలో విడుదలయిన 26 జీవోలు వివాదాస్పదమైన విషయం తెలిసిందే. ఈ జీవోలు అక్రమాస్తుల కేసులో అరెస్ట్ అయిన జగన్ కి లబ్ది పొందే విధంగా ఉన్నాయనే ఆరోపణలతో సుప్రీం కోర్టు నుండి నోటీసులు అందుకున్న మంత్రులకు న్యాయ సహాయం చేయాలని ప్రభుత్వం కొత్త విధానం ప్రవేశ పెట్టింది. ఈ జీవోల పై నోటీసులు అందుకున్న మంత్రులకు లాయర్లకు చెల్లించే ఫీజు ప్రభుత్వమే భరించాలని నిర్ణయించింది. ఈ మేరకు దీని పై జీఓను జారి చేసింది.

ప్రభుత్వం నుండి న్యాయ సహాయం పొందే మంత్రుల జాబితాలో ధర్మాన ప్రసాదరావు, కన్నా లక్ష్మినారాయణ, సబితా ఇంద్రారెడ్డి, గీతారెడ్డిలకు ఈ సహాయం అందుతుంది. ఇదే జీఓల కేసులో అరెస్టు అయిన మోపిదేవి వెంకటరమణ, ఐటీ శాఖ మంత్రి పొన్నాల లక్ష్మయ్యల అభ్యర్థను మాత్రం ముఖ్యమంత్రి కిరణ్ కుమార్ రెడ్డి అనుమతించనట్లు తెలుస్తుంది. అంటే కిరణ్ కుమార్ రెడ్డి ద్రుష్టిలో ఈ నలుగురు మంత్రుల తప్పులేదని, ఆ ఇద్దరి మంత్రుల తప్పు ఉన్నట్లని భావించే వారికి సహాయం అందించడం లేదని రాజకీయ విశ్లేషకులు అంటున్నారు. ఇలా తప్పుడు పనులు చేసిన మంత్రులకు కూడా న్యాయ సహాయం అందించడం పై పలువురు మండిపడుతున్నారు.