Posted: 07/06/2012 06:33 PM IST

మెగాస్టార్ చిరంజీవి, కాంగ్రెస్ పార్టీ రాజ్యసభ సభ్యుడు చిరంజీవి వియ్యంకుడు, రామ్ చరణ్ తేజ మామ, ఉపాసన తండ్రి  అయిన కామినేని అనిల్ కి కామారెడ్డి కోర్టు నోటీసులు జారీ చేసింది. జులై 12 తేదీని విచారణకు హాజరు కావాల్సిందిగా ఆదేశించినట్లు తెలుస్తుంది. ఈ నోటీసులు రామ్ చరణ్ – ఉపాసనల పెండ్లికి సంబంధించి జారీ కావడం విశేషం.

రామ్ చరణ్ – ఉపాసనల వివాహం జూన్ 14వ తేదీన అంగరంగ వైభవంగా జరిగిన విషయం తెలిసిందే. అయితే ఈ పెండ్లికి సంబంధించిన కార్యక్రమాలు ఉపాసన పూర్వీకుల గ్రామం అయిన దోమకొండలోని కోటలో నిర్వహించిన విషయం తెలిసిందే. ఈ కార్యక్రమం కోసం ఆ గ్రామంలోని కోట చుట్టు నివాసం ఉంటున్న కుటుంబాలను కామినేని అనిల్ బలవంతగా ఖాళీ చేయించారని సమాచారం.

దీని పై బాధితులు కోర్టును ఆశ్రయించారు. తనను అన్యాయంగా ఖాళీ చేయించారని, దానికి తగిన నష్టపరిహారం కూడా చెల్లించకుండా మమ్మల్ని రోడ్ల పై పడేశారని, తమకు న్యాయం చేయాలని సదరు బాధితులు ఫిర్యాదు మేరకు కోర్టు నోటీసులు జారీ చేసింది. ఈ నోటీసుల పై కామినేని అనిల్ ఏవిధంగా స్పందిస్తారో చూడాలి.