Posted: 07/01/2012 07:47 PM IST

      నేటి నుంచి సేవా పన్ను వర్తించే సర్వీసుల సంఖ్య పెరగనుంది. ఇప్పటివరకు 119 సర్వీసులపై ఉన్న సేవాపన్నును ఇంకా ఏయే సర్వీసులకు విధించాలి? వేటిని మినహాయించాలి? అన్న విషయాలపై కేంద్ర ప్రభుత్వం పరిశీలన జరిపింది. ఈ ప్రకారం కేవలం 38 రకాల సర్వీసులను మాత్రం తప్పించి మిగిలిన సేవలన్నింటిపైనా జులై 1 నుంచి 12 శాతం మేర సేవా పన్నును ప్రభుత్వం వసూలు చేయనుంది. ఈ దెబ్బకు విద్యార్థులు మొదలుకొని సినిమా నటుల వరకూ ఇబ్బందులు ఎదుర్కోనున్నారు. తాజా సవరణల ప్రకారం కోచింగ్ ఇన్ స్టిట్యూట్ లో ఫీజు కట్టినా, నటీనటులు పారితోషికం తీసుకున్నా, సదరు మొత్తంపై 12 శాతం సేవా పన్నును కట్టి తీరాల్సిందే. గుడ్డిలో మెల్లగా రైల్వే ప్రయాణీకుల టికెట్లపై మాత్రం సేవా పన్నును వర్తింపజేయకపోవడం సామాన్యులకు ఊరట కలిగించే అంశం. గత ఏడాది ఈ సేవా పన్ను ద్వారా 97 వేల కోట్ల రూపాయలను ఆర్జించిన కేంద్ర ప్రభుత్వం, ఈ సారి లక్షా 24 వేల కోట్లు రాబట్టాలని లక్ష్యంగా పెట్టుకుంది.

....avnk