Posted: 06/26/2012 06:16 PM IST

కర్ణాటక రాజకీయం మళ్ళీ రసదాయకంగా మారింది. ఇన్ని రోజులు కంటిలోని నలుసు లాగా ఎప్పుడు అధిష్టానానికి ఏదో ఒక విధంగా జలక్ లు ఇవ్వడమే కాకుండా, ప్రస్తుత ముఖ్యమంత్రి సదానంద గౌడకు కంటి మీద కునుకు లేకుండా చేసిన యడ్యూరప్ప ఈ మధ్యన కాస్త చల్లబడ్డాడు. ఇక అంతా సవ్యంగా ఉంటుందనుకున్న సమయంలో బీజేపీ అధిష్టానమే ఓ సంచలనాత్మక నిర్ణయం తీసుకున్నట్లు సమాచారం. కర్ణాటక రాష్ట్ర నాయకత్వ మార్పులు చేసే దిశగా అడుగులు వేస్తున్నట్లు సమాచారం.  తాజాగా అందిన సమాచారం మేరకు.. కర్నాటక బిజెపి ఇంచార్జ్ ధర్మేంద్ర ప్రధాన్, పార్టీ జాతీయ కార్యనిర్వాహక కార్యదర్శి సతీష్‌లు ఈ నెల 28వ తేదిన బెంగళూరు రానున్నారు.

గతంలో యడ్యూరప్ప రాజీనామా తరువాత బీజేపీ ఎవరి అభిప్రాయం తీసుకోకుండానే తన సొంత నిర్ణయంతో సదానందకు సీఎం పీఠం అప్పగించారు. అయితే దీని పై భిన్నాభిప్రాయాలు రావడంతో ఈ సారి అందరి అభిప్రాయాన్ని సేకరించాలని భావిస్తుంది. అభిప్రాయ సేకరణను పార్టీ ఇన్‌చార్జీ ధర్మేంధ్రప్రధాన, కార్యదర్శి సతీష్‌లు చేపట్టనున్నారు. త్వరలోనే సీఎం సదానందగౌడ్, మాజీ సీఎం యడ్యూరప్ప, అధ్యక్షుడు ఈశ్వరప్పలతో పార్టీ ప్రతినిధులు భేటీ అయి ఈ నివేదికను అధ్యక్షుడు గడ్కరీకి సమర్పించిన తరువాత నాయకత్వ మార్పు ఉంటుందని సమాచారం. మరి సదానంద పదవి ఉంటుందో ఊడుతుందో చూడాలి.