Posted: 05/27/2012 02:01 PM IST

      రాష్ట్రంలో జరుగుతున్న ఉప ఎన్నికల నేపథ్యంలో మెరుగైన విజయాలను నమోదు చేసుకొనేందుకు టిడిపి సర్వశక్తులు ఒడ్డుతోంది. జోరుగా ఉప ప్రచారం జరుగుతున్న తరుణంలోనే జగన్  ను సీబీఐ ప్రశ్నిస్తోంది. ఆస్తుల కేసులో జగన్ అరెస్టైతే...ఉప ఎన్నికల్లో ఆ పార్టీకి రాజకీయంగా కలిసి వచ్చే అవకాశం ఉందని టిడిపి అంచనా వేస్తోంది. తమకు విజయావకాశాలు ఉన్న స్థానాల్లో కూడ సానుభూతి ప్రభావం చూపితే పరిస్థితి ఏమిటని ఆ పార్టీ తర్జనభర్జన పడుతోంది. ఈ పరిస్థితిలో తాము అధికారంలో ఉన్న సమయంలో చేపట్టిన అభివృద్ధి సంక్షేమ కార్యక్రమాల్ని ప్రజలకు వివరించే ప్రయత్నం చేస్తోంది. అటు జగన్ కేసులో సిబిఐ విచారణ తీరుతెన్నులను నిశితంగా పరిశీలిస్తోంది. సోమవారం జగన్ సిబిఐ కోర్టుకు హాజరు కానున్నారు. కొన్ని రోజులుగా జగన్ ను అరెస్టు చేయాలని టిడిపి డిమాండ్ చేస్తూ వచ్చింది. అయితే తర్వాతి పరిణామాల్లో జగన్ పై విమర్శల పదునును తగ్గించింది. అయితే చట్టం తన పని తాను చేసుకొనిపోవాలనేది తమ అభిమతమన్నారు.
    అయితే వైఎస్ఆర్ కాంగ్రెస్ పార్టీ వైపు కొందరు పార్టీ నాయకులు, శాసనసభ్యులు వెళ్తారనే ప్రచారం సాగుతోంది. అయితే ఈ ప్రచారాన్ని టిడిపి వర్గాలు కొట్టిపారేస్తున్నాయి. తమ పార్టీ నుండి ఎవరూ వెళ్ళరని మీడియా చేస్తోన్న ప్రచారంగా నాయకులు కొట్టిపారేస్తున్నారు. ఉప ఎన్నికల్లో తెలుగుదేశం అనుసరించే వ్యూహాం ఆ పార్టీకి ఏ మేరకు ఫలిస్తోందో ఉప ఫలితాలు తేల్చనున్నాయి.

...avnk