Posted: 04/27/2012 07:31 PM IST

పితృత్వ పరీక్ష కేసులో విచారణను ఎదుర్కొంటున్న ఎపి మాజీ గవర్నర్ ఎన్.డి. తివారికి ఇవాళ మళ్ళీ హైకోర్టులో ఎదురు దెబ్బ తగిలింది. గత కొన్ని రోజులకు డీఎన్ఏ పరీక్షకు రక్తనమూనాను ఇవ్వడానికి సహకరించని తివారికి ఢిల్లీ హైకోర్టు డీఎన్ఏ పరీక్షకు సహకరించాల్సిందేనని హుకుం జారీ చేసింది. ఆయన గనుక రక్త నమూనా ఇవ్వడానికి నిరాకరిస్తే పోలీసుల సహాయంతోనైనా బలవంతంగా తీసుకోవాలని ఆదేశించింది.తన తల్లి ఉజ్వల శర్మతో ఉన్న లైంగిక సంబంధంతోనే తాను జన్మించానని చెబుతున్న రోహిత్ అనే యువకుడు తన తండ్రి తివారీయేనని పిటీషన్ వేసిన సంగతి తెలిసిందే. దీంతో తివారీకి పితృత్వ పరీక్షలు నిర్వహించాలని ఢిల్లీ హైకోర్టు గతేడాది డిసెంబర్‌లో ఆదేశాలు జారీ చేసిన విషయం విదితమే.

అయితే, పితృత్వ పరీక్షలకు తివారీ అభ్యంతరాలు వ్యక్తం చేస్తున్నారు. అది తన ప్రైవసీని దెబ్బ తీసే చర్య అని ఆయన అభివర్ణిస్తున్నారు. పితృత్వం కేసులో తివారీ రక్త నమూనాను ఇవ్వాలని బలవంతం చేయవద్దని హైకోర్టు సింగిల్ జడ్డీ ఇచ్చిన ఆదేశాలను డివిజన్ బెంచ్ తిరస్కరించింది.