Posted: 04/13/2012 10:39 AM IST

ఢిల్లీలో వారం రోజుల పాటు తిష్టవేసినా అక్కడ కానీ, రాష్ట్రానికి చేరుకున్న తర్వాత కానీ కెసిఆర్ మీడియాకు దూరంగా ఉండిపోవడంతో తెలంగాణవాదుల్లో అయోమయం నెలకొంది. టిఆర్‌ఎస్ ముఖ్య నాయకులు మాత్రం కెసిఆర్ మౌనానికి కారణాలు వేరే ఉన్నాయని విశ్లేషిస్తున్నారు. తెలంగాణలో జరుగుతున్న ఆత్మహత్యలపై తెలంగాణ రాజకీయ, ప్రజాసంఘాల ఐకాస (టిజెఎసి) చేపట్టిన బస్సుయాత్రకు టిఆర్‌ఎస్ పార్టీ దూరంగా ఉండటం తెలంగాణవాదుల్లో చర్చనీయాంశంగా మారింది. తెలంగాణ రాష్ట్రం కోసం టిఆర్‌ఎస్ అధినేత కెసిఆర్ ఢిల్లీలో లాబీయింగ్ జరుపుతున్నారని టిజెఎసి చైర్మన్ ప్రొఫెసర్ కోదండరామ్ స్వయంగా చెప్పినప్పటికీ, ఆయన రాష్ట్రానికి చేరుకొని వారం గడుస్తున్నా ఆ ఊసే ఎత్తకుండా మౌనంగా ఉండిపోవడం పట్ల తెలంగాణవాదులు ఆందోళన చెందుతున్నారు. సీమాంధ్రలో జరుగుతున్న ఉప ఎన్నికలు ముగిసే వరకు మౌనంగా ఉండాలని కాంగ్రెస్ అధిష్ఠానం విజ్ఞప్తి చేసిందని, ఆ కారణంగానే ఆయన నోరు మెదపకుండా ఉండేందుకు ఫామ్ హౌస్‌లో విశ్రాంతి తీసుకుంటున్నారని అంటున్నారు.

కెసిఆర్ ఢిల్లీకి ఎప్పుడు వెళ్లివచ్చినా అక్కడ జరుగుతోన్న పరిణామాలను టిజెఎసి నేతలతో పంచుకునే వారు. కానీ ఈసారి అక్కడి విషయాలను టిజెఎసి నేతలతో కెసిఆర్ పంచుకోకపోవడంతో అక్కడి పరిణామాలు తమకు కూడా తెలియడం లేదని టిజెఎసిలో కీలక భూమిక పోషిస్తోన్న నాయకుడు ఒకరు వాపోయారు. అయితే ఈ నెల 24లోగా తెలంగాణపై కాంగ్రెస్, టిడిపిలు తమ వైఖరి వెల్లడించాలని టిజెఎసి ఆ రెండు పార్టీలకు డెడ్‌లైన్ విధించినప్పటికీ, ఆ విషయంపై టిఆర్‌ఎస్ నేతలు నోరు మెదపకపోవడంలో ఆంతర్యం ఏమిటో తెలియడం లేదని తెలంగాణవాదులు, టిజెఎసి నేతలు వాపోతున్నారు. సీమాంధ్రలో ఉప ఎన్నికల ప్రక్రియ పూర్తి అయ్యేవరకు తెలంగాణ అంశంపై టిఆర్‌ఎస్‌ను మౌనంగా ఉండమని కాంగ్రెస్ అధిష్ఠానం ఆదేశించి ఉండవచ్చని, అందుకే ఆయన కెసిఆర్ నోరు మెదపడం లేదని టిజెఎసి నేతలు అనుమానిస్తున్నారు. కాంగ్రెస్ అధిష్ఠానం వర్గంలోని పెద్దలను కలవడానికే, పార్లమెంట్ సమావేశాలు ముగిశాక కూడా కెసిఆర్ అక్కడ ఎక్కువ రోజులే ఉన్నారని విశ్వసనీయంగా తెలుస్తున్న నేపథ్యంలో ఆ సందర్భంలో ఎవరెవరిని కలిసింది, వారు ఆయనకు ఏమి చెప్పింది, ఆ విషయాలేవి బయటికి పొక్కకుండా టిఆర్‌ఎస్ జాగ్రత్త పడుతోంది.

మరోవైపు టిఆర్‌ఎస్ వైఖరి ఎలా ఉన్నా, వారి కోసం వేచి చూడకుండా తాము మాత్రం ఊరూర తిరిగి కనీసం ఆత్మహత్యలు ఆపేందుకైనా బస్సుయాత్ర పెట్టుకున్నామని టిజెఎసి నేత ఒకరు తెలిపారు. ఇలా ఉండగా, ఢిల్లీ నుంచి వచ్చాక కెసిఆర్ మౌనంగా ఉండటానికి, కారణాలు వేరే ఉన్నాయని టిఆర్‌ఎస్ ముఖ్య నాయకుడు ఒకరు తెలిపారు. తెలంగాణ రాష్ట్రాన్ని ఇస్తామని ప్రకటించి రెండేళ్లు గడిచాక కూడా ఆ వాదం ఈ ప్రాంతంలో ఎంతబలంగా ఉందో ఇటీవల జరిగిన ఉప ఎన్నికల ఫలితాలను బట్టి కాంగ్రెస్ ఒక అంచనాకు వచ్చిందని, అలాగే రాష్ట్రాన్ని విభజించవద్దని సీమాంధ్రలో జరిగిన సమైక్యవాదం ఇంకా ఏమేరకు ఉందో అక్కడ జరిగే ఉప ఎన్నికల తర్వాతగానీ ఒక అంచనాకు వస్తామని, అప్పటి వరకు మౌనంగా ఉండమని కెసిఆర్‌ను కాంగ్రెస్ అధిష్ఠానం కోరిందని, అదే ఆయన వౌనానికి కారణమై ఉంటుందని సదరు నాయకుడు అభిప్రాయపడ్డారు.