Posted: 04/09/2012 01:33 PM IST

యూకేలో తీవ్ర నీటి కొరత ఏర్పడింది. ఎంతలా అంటే.. తోటలకు నీళ్లు పట్టడానికి పైపుల వాడకాన్ని ప్రభుత్వం నిషేధించింది! ఒకవేళ ఈ నిబంధనను అతిక్రమిస్తే వంద పౌండ్ల అపరాధ రుసుం విధించనుంది. బ్రిటిషర్లు గార్డెనింగ్ కు అధిక ప్రాముఖ్యం ఇస్తారు. అందునా ఆగ్నేయ ఇంగ్లాండ్ వాసులలో ఈ అలవాటు ఎక్కువగా కనిపిస్తుంది. తోటపని అంటే అక్కడి వారికి మహా ఇష్టం. 70శాతం బ్రిటిషర్లు దాన్ని ఒక ముఖ్యమైన పనిగా భావిస్తారు. అందుకే ఈ ప్రాంతాల్లోనే ప్రభుత్వం నీటిపైపుల వాడకాన్ని నిషేధించింది. అయితే ఈ నిర్ణయంపై దేశంలో సర్వత్రా నిరసన వ్యక్తమవుతోంది. ప్రస్తుతం బ్రిటన్‌లో తీవ్ర కరువు నెలకొంది.

రెండేళ్లుగా నీటిచుక్క దొరకడం లేదు. రికార్డుస్థాయిలో కొరత ఏర్పడింది. ప్రజల అవసరాలను తీర్చడానికి నీటి సరఫరా సంస్థలు తంటాలు పడుతున్నాయి. ఈ నేపథ్యంలోనే గార్డెనింగ్‌పై నిషేధం తప్పలేదని ప్రభుత్వ వర్గాలు చెబుతున్నాయి. దీనివల్ల దాదాపు 20లక్షల మంది తమ సరదాకు దూరమవుతారని అంచనా. ఒలింపిక్ స్టేడియాల్లోని పచ్చిక బయళ్లను మాత్రం ఈ నిషేధం నుంచి మినహాయించారు. నీటిని తెలివిగా వినియోగించండి అంటూ ప్రభుత్వం, నీటి సరఫరా సంస్థలు సూచిస్తున్నాయి. నీళ్లను ఎలా పొదుపుగా వాడుకోవాలో సలహా ఇస్తున్నాయి.