Posted: 03/27/2012 01:06 PM IST

ఆర్మీ చీఫ్‌ వీకే. సింగ్‌ సంచలన ఆరోపణలు చేశారు. ఓ నేషనల్‌ డెయిలీకిచ్చిన ఇంటర్వ్యూలో వీకే సింగ్‌ ఈ వ్యాఖ్యలు చేశారు. ఆర్మీకి అవసరమైన వాహనాల కొనుగోలుకు సంబంధించి ఓ ఎక్విప్‌మెంట్‌ లాబీయిస్ట్‌ తనకు 14 కోట్ల రూపాయల లంచం ఇవ్వజూపారని వీకే సింగ్‌ అన్నారు. 600 వాహనాలు కొనాలని చూస్తున్న తరుణంలో... ఓ లాబీయిస్ట్‌ తన దగ్గరకు వచ్చాడని, అతను చెప్పిన వాహనాలు కొంటే 14 కోట్లు ఇస్తానని చెప్పాడని ఆర్మీ చీఫ్‌ అన్నారు.

ఐతే అదే తరహా వాహనాలు ఇప్పటికే 7 వేలకు పైగా ఆర్మీలో ఉన్నాయని సింగ్‌ చెప్పారు. వాటిలో సరైన వసతులు లేవని కూడా అన్నారు. ఇదే విషయాన్ని రక్షణ శాఖ మంత్రి ఏకే ఆంటోనికి రిపోర్ట్‌ చేశారు ఆర్మీ చీఫ్‌. ఏకంగా తనకే లంచమిచ్చేందుకు సిద్ధమయ్యారంటే పరిస్థితి ఎంత దారుణంగా తయారైందో అర్థమవుతోందని ఆందోళన వ్యక్తం చేశారు. కొద్ది రోజుల కిందట పుట్టిన తేదీ వివాదంలో ఇరుక్కున్న ఆర్మీ చీఫ్‌... తను నిజాయితీ పరుడినని చెప్పుకునేందుకు తాజా ఎపిసోడ్‌ను ఆయుధంగా మార్చుకుంటున్నారు. ఈ ఆరోపణల పై పార్లమెంట్ దద్దరిల్లింది.