Posted: 03/26/2012 11:43 AM IST

తేనీరుతో ఆరోగ్య ప్రయోజనాలు ఎన్నో ఉన్నాయన్న విషయం తెలిసిందే. ఇప్పుడు ఆ జాబితాలోకి మరో ఉపయోగాన్ని చేర్చుకోవాల్సి ఉంది. రోజుకు రెండు కప్పుల వేడి పానీయాన్ని సేవిస్తే మహిళలకు పిల్లలు పుట్టే అవకాశం పెరుగుతుందని తాజా అధ్యయనంలో తేలింది. టీ తాగని స్త్రీలతో పోల్చితే తాగే మహిళల్లో గర్భందాల్చే అవకాశం 27 శాతం ఎక్కువని బోస్టన్ వర్సిటీ పరిశోధకులు పేర్కొన్నారు. పానీయాల్లో ఉండే ఆక్సీకరణ నిరోధకాలు గర్భధారణకు సహకరిస్తాయని తెలిపారు. శీతలపానీయాలు తాగేవారిలో గర్భందాల్చే అవకాశాలు తగ్గుతాయని హెచ్చరించారు. కాఫీ సేవిస్తే మాత్రం ఇలాంటి ప్రమాదాలేవీ ఉండవని స్పష్టం చేశారు. సంతానం కోసం తీవ్రంగా కృషి చేస్తున్న సుమారు 3,600 మంది మహిళలపై ఏడాదిపాటు విశ్లేషణ జరిపి ఈ విషయాలను కనుగొన్నారు. పాలు, నిమ్మరసం, గ్రీన్ టీ, హెర్బల్ టీ కూడా గర్భందాల్చే అవకాశాలను పెంచుతాయని తెలిపారు.