Posted: 03/20/2012 10:39 AM IST

శాసనసభను వాయిదా వేయడంలో గిన్నిస్‌ బుక్‌ రికార్డులను తిరగరాస్తున్నారని సిపిఎం శాసనసభ్యుడు జూలకంటి రంగారెడ్డి ఎద్దేవా చేశారు. సభ వాయిదా అనంతరం ఆయన మీడియా పాయింట్‌లో మాట్లాడుతూ ప్రజా సమస్యలపై సభలో చర్చ జరగనప్పుడు సభ్యులు హాజరై ఏం ప్రయోజనమని ప్రశ్నించారు. విపక్ష సభ్యులు అడిగిన ప్రశ్నలకు సమాధానం చెప్పకుండా ప్రభుత్వం దాటవేయడాన్ని తప్పుబట్టారు. జగన్‌ ఆస్తుల విషయంలో ఆరుగురు మంత్రులకు సుప్రీంకోర్టు నోటీసులిచ్చిన నేపథ్యంలో సదరు జీవోల ఫైళ్లను సభ ముందు ఉంచడానికి ప్రభుత్వం ఎందుకు జంకుతోందని ప్రశ్నించారు. ప్రస్తుతం రాష్ట్రంలోని పలు గ్రామాలు, పట్ణణాల్లో తీవ్ర నీటి ఎద్దడి నెలకొందని, కరెంటు కోతలతో రైతులు అల్లాడుతున్నారని ఆవేదన వ్యక్తం చేశారు. పలు రంగాలకు చెందిన కార్మికులు, ఉద్యోగులు కనీస వేతనాల కోసం పోరాడుతున్నారని తెలిపారు. ప్రభుత్వానికి మాత్రం ఇవేమీ పట్టడం లేదని విమర్శించారు. కనీసం ఇప్పటి నుంచైనా ప్రజా సమస్యలపై సమగ్రంగా చర్చించాలని కోరారు. లేదంటే ప్రజలు క్షమించబోరని హెచ్చరించారు.