Posted: 03/13/2012 04:23 PM IST

పర్యావరణాన్ని కాపాడుకునేందుకు ఎర్త్ అవర్-2012 కార్యక్రమానికి మాస్టర్ బ్లాస్టర్ సచిన్ టెండూల్కర్ అండగా నిలిచాడు. భూతాపాన్ని తగ్గించేందుకు ఏడాదిలో ఓ గంటపాటు ప్రతి ఒక్కరు తమ విద్యుత్ దీపాలను ఆర్పివేయాలంటూ డబ్ల్యుడబ్ల్యుఎఫ్-ఇండియా అనే స్వచ్ఛంద సంస్థ కొంత కాలంగా కార్యక్రమాలను నిర్వహిస్తోంది. తాజాగా సచిన్ వీరితో చేతులు కలిపాడు. ఈ నెల 31న జరిగే ఎర్త్ అవర్ కార్యక్రమంలో దేశంలోని ఆయా నగరాల్లోని సంస్థలు, ఇళ్లు, కార్యాలయాల్లో లైట్లను ఆర్పివేయాలని సచిన్ కోరాడు. ఈనేపథ్యంలో ఏ సిటీలోనైతే ఎక్కువ మంది ఈ ఉద్యమంలో పాల్గొంటారో ఆ నగరాన్ని ఎర్త్ అవర్ చాంపియన్‌గా పరిగణిస్తారు. ప్రతీ ఏడాది 135 దేశాల్లోని 5,200 నగరాలు ఎర్త్ అవర్‌లో పాల్గొంటున్నాయి. 1.8 బిలియన్ ప్రజలు పాల్గొని రికార్డు సృష్టించారు. భారత్‌లో 130 నగరాలు ఈ కార్యక్రమంలో పాలుపంచుకుంటున్నాయి. వీటిలో చిన్న పట్టణాలు, గ్రామాలు కూడా ఉండడం విశేషం.