Posted: 03/08/2012 03:18 PM IST

టీడీపీ అధినేత చంద్రబాబు నాయుడు రోజు రోజుకు తన దూకుడు ప్రదర్శిస్తున్నాడు. బడ్జెట్ సమావేశాల సందర్భంగా  చంద్రబాబు నాయుడు ముఖ్యమంత్రి పైనా మంత్రుల పైనా తన దూకుడును ప్రదర్శిస్తున్నారు. అంతే కాకుండా బాబు మరో అడుగు ముందుకేసి స్పీకర్ పైన కూడా విరుచుకుపడ్డారు. శాసనసభ నిర్వహణ విషయంలో స్పీకర్ నాదెండ్ల మనోహర్ వైఖరి చిన్నపిల్లాడి చేష్టలను తలపిస్తోందని తెలుగుదేశం అధ్యక్షుడు చంద్రబాబునాయుడు విమర్శించారు. ఈ పరిస్థితుల్లో ఆయనపై అవిశ్వాస తీర్మానం పెట్టడం మినహా తమకు గత్యంతరం లేదన్నారు.సీఎం కిరణ్‌కుమార్‌రెడ్డితోపాటు స్పీకర్ నాదెండ్లకు సభానిర్వహణ పట్ల చిత్తశుద్ధి లేదని మండిపడ్డారు. వీరు ఏమీ పట్టనట్లు వ్యవహరిస్తున్నారని ధ్వజమెత్తారు. విద్యుత్‌రంగ నిర్వహణ చేతకాకపోతే సీఎం పదవి నుంచి వైదొలిగి ఇంటికి పోవాలితప్ప ప్రజల జీవితాలతో ఆడుకోవటం సరికాదని మండిపడ్డారు.

ఇప్పటికి సభ 17 రోజులు జరిగినా చర్చించిన అంశాలు చాలా తక్కువన్నారు. మరో 13 రోజులే సభ జరుగుతుందని, ఇలాగే వాయిదా వేసుకుంటూపోతే ఇంకేమి చర్చిస్తామని ఆందోళన వ్యక్తం చేశారు. ప్రధానమైన అంశాల్ని చర్చకు తెచ్చేందుకు తాము రాజీపడి సహకరిస్తున్నా ప్రభుత్వానికి మాత్రం సభ నడిపించాలని లేదని ధ్వజమెత్తారు. తప్పించుకు తిరిగేందుకు ప్రభుత్వం ప్రాధాన్యతనిస్తోందని, అందుకు స్పీకర్ సహకరిస్తున్నారని ఆరోపించారు. రోజూ సభను నడపాలని మేం వెళ్లి స్పీకర్ చాంబర్‌లో ధర్నాలు చేయాలా, అడుక్కోవాలా? అని ఆగ్రహం వ్యక్తం చేశారు. విద్యుత్ సమస్యపై చర్చను బుధవారానికి పూర్తి చేస్తానని, తనకూ మాట్లాడేందుకు అవకాశమిస్తానన్న స్పీకర్ సభను అర్ధంతరంగా వాయిదా వేసుకుని వెళ్లారని, ఈ చర్యను తీవ్రంగా ఖండిస్తున్నానని చెప్పారు.