Posted: 03/05/2012 08:37 PM IST

టీడీపీ తరపున రాజ్యసభ అభ్యర్థిగా పార్టీ సీనియర్ నేత యనమల రామకృష్ణుడు పేరు ఖరారైంది. ఇక అధికారికంగా ప్రకటించడమే మిగిలి ఉంది. ప్రస్తుతం పార్టీ తరఫున ప్రాతినిధ్యం వహిస్తున్న ఎం.వి.మైసూరారెడ్డి పదవీకాలం ఏప్రిల్ తొలివారంలో ముగియనుంది. కాగా ఎమ్మెల్యేల సంఖ్యాబలం ఆధారంగా టీడీపీకి రెండు రాజ్యసభ సీట్లు లభిస్తాయి. ఇటీవల టీడీపీ అధ్యక్షుడు చ ంద్రబాబుతోపాటు ఆయన బినామీల అక్రమాస్తులపై విచారణ జరపాల్సిందిగా వైఎస్‌ఆర్ కాంగ్రెస్ పార్టీ గౌరవాధ్యక్షురాలు వైఎస్ విజయమ్మ వేసిన పిటిషన్‌ను హైకోర్టు ధర్మాసనం తోసిపుచ్చిన రోజునే యనమలకు రాజ్యసభ టికెట్టు ఖరారైందని పార్టీ నేతలు చెప్పారు. ఇక మిగిలింది మరో సీటు. దీనిని పారిశ్రామికవేత్త, పార్టీ ఉపాధ్యక్షుడు సీఎం రమేష్, సీనియర్ నేత ఉమ్మారెడ్డి వెంకటేశ్వర్లుతోపాటు బోండా ఉమామహేశ్వరరావు, చందు సాంబశివరావు, చిక్కాల రామచంద్రరావులు ఆశిస్తున్నారు. వీరితోపాటు సీమాంధ్ర నుంచి వర్ల రామయ్య, ఉప్పులేటి కల్పన తదితరులు రాజ్యసభకు వెళ్లాలనే ఆశతోఉన్నారు.

తెలంగాణ ప్రాంతంలోని ఆరు అసెంబ్లీ నియోజకవర్గాల్లో ఉప ఎన్నికలు జరుగుతున్న నేపథ్యంలో ఇక్కడినుంచి ఒకరిని రాజ్యసభకు పంపక తప్పనిసరి పరిస్థితి నెలకొంది. ఆరింటిలో మూడు స్థానాలు మహబూబ్‌నగర్ జిల్లాలోనే ఉన్నాయి. ఈ మూడింటిలోనూ ఒక్క సీటును కూడా దళితులకు కేటాయించలేదు. దీంతో ఈ జిల్లాకు చెందిన బక్కని నరసింహులుకు రాజ్యసభ సీటు ఇవ్వక తప్పని పరిస్థితి చంద్రబాబుకు నె లకొంది. అయితే తెలంగాణ నుంచి రాజ్యసభ సీటును ఆశించేవారిలో ఎం.అరవిందకుమార్‌గౌడ్, గరికపాటి మోహనరావు, తలసాని శ్రీనివాసయాదవ్, వేం నరేందర్‌రెడ్డి, పాల్వాయి రజనీకుమారి, అరిగెల నాగేశ్వరరావు, తీగల కృష్ణారె డ్డి, జి.సాయన్న తదితరులున్నారు.