Posted: 02/23/2012 10:31 AM IST

తనవి చౌకబారు మాటలో, ధర్మానది అధికార దుర్వినియోగమో ఆయన సొంత జిల్లా శ్రీకాకుళంలోనే తేల్చుకుందామని.. దమ్ముంటే అక్కడ ప్రజావేదిక ఏర్పాటుచేయాలని సీపీఐ రాష్ట్ర కార్యదర్శి కె నారాయణ మంత్రి ధర్మాన ప్రసాద్‌కు సవాల్ విసిరారు. సభలో సభ్యుడిని కాని తన గురించి అసెంబ్లీలో మాట్లాడటం చట్ట విరుద్ధమని, ధర్మానపై స్పీకర్ చర్యలు తీసుకోవాలని డిమాండ్ చేశారు. సీపీఐ మహాసభల సందర్భంగా కరీంనగర్‌లో జరిగిన బహిరంగ సభలో నారాయణ మాట్లాడారు. మంత్రి ధర్మాన తన కొడుకు పెళ్లి రిసెప్షన్ కోసం శ్రీకాకుళంలోని వీఆర్వో పరీక్షా కేంద్రమైన ప్రభుత్వ కళాశాలను వాడుకున్నారని, దీంతో ఆ కళాశాలలో వేయాల్సిన కేంద్రాన్ని 150 కిలోమీటర్ల దూరంలో ఉన్న ఇచ్ఛాపురానికి తరలించారని తెలిపారు.

ఫలితంగా శ్రీకాకుళం శివారు గ్రామానికి చెందిన రామ్మోహన్ తన కూతురుతో పరీక్ష రాయించేందుకు మోటర్ సైకిల్‌పై వెళుతూ ప్రమాదానికి గురై చనిపోయారని, కూతురు రెండు కాళ్లు విరిగిపోయాయని నారాయణ వివరించారు. ఈ విధంగా మంత్రి ధర్మాన అధికార దుర్వినియోగానికి పాల్పడ్డారని నారాయణ ఆరోపించారు. ఈ విషయమై అసెంబ్లీలో ప్రతిపక్ష నాయకులు చంద్రబాబు మాట్లాడుతున్నపుడు కలగజేసుకున్న మంత్రి ధర్మాన, సీపీఐ నాయకులు నారాయణ లాగే చౌక బారుగా మాట్లాడుతున్నారని వ్యాఖ్యానించారు. దీనికి స్పందిస్తూ తాను చేసిన వ్యాఖ్యలు చౌకబారువని నిరూపిస్తే సీపీఐ రాష్ట్ర కార్యదర్శి పదవికి రాజీనామా చేస్తానని, కొడుకు రిసెప్షన్ కోసం సెంటర్ మార్చినట్లు తాను నిరూపిస్తే ధర్మాన మంత్రి పదవికి రాజీనామా చేయాలని డిమాండ్ చేశారు. ఈ విషయమై మంత్రి సొంత జిల్లా శ్రీకాకుళంలోనే ప్రజా వేదిక ఏర్పాటు చేయాలని ఆయన సవాల్ విసిరారు.