Posted: 02/14/2012 03:10 PM IST

నిన్న న్యూఢిల్లీలో ఇజ్రాయల్ డిప్లోమాట్ భార్య తాల్ యహోషువా కోరెన్ కారుమీద జరిగిన బాంబు దాడి వెనుక ఇరాన్ హస్తముందని వస్తున్న వార్తలను ఇరాన్ ప్రభుత్వం ఖండించింది. అసలే సున్నితంగా ఉన్న ఆ ఇరు దేశాల మధ్య సంబంధం ఈ వార్తల వలన ఇంకా నష్టపడే అవకాశముందని వారి భావన. పిల్లలను స్కూల్ నుంచి తీసుకునిరావటానికి వెళ్ళిన ఇజ్లాయల్ డిప్లోమాట్ భార్య కారుకి మాగ్నెటిక్ ఫోర్స్ తో బాంబ్ అతికించి చేసిన దాడి విధానం సరిగ్గా జార్జియాలో జరిగిన ఒక విఫల ప్రయత్నంలో దొరికిన ఆధారాలతో సరిపోవటం వలన దాన్ని ఇరాన్ కి ఉగ్రవాద సంస్థ చేసిందనటం సరికాదని ఇరాన్ అధికార ప్రతినిధి రామిన్ మెహమాన్ పరాస్త్ అన్నారు.

ఈ ఘటన జరగగానే ఇజ్రాయిల్ ప్రధాన మంత్రి బెంజమిన్ నేతన్యాహూ ఇరాన్ దేశాన్ని ఆరోపించారు. బాంబు దాడిలో గాయపడ్డ కోరెన్ కి నిన్న శస్త్ర చికిత్స జరిగింది.

ఈ దాడి మీద మాట్లాడుతూ, భారత హోం మంత్రి చిదంబరం, అన్ని దేశాల దౌత్యాధికారులకూ భారత్ లో శాంతి భద్రతల నడుమ నివసించే హక్కుందని, అయితే నిన్న జరిగిన దాడిలాంటి వాటిల్లో శిక్షణ పొందినవారు మాత్రమే ఆలా చెయ్యగలిగిందని, దీని మీద చేసే దర్యాప్తులో ఉగ్రవాద కోణంలో చెయ్యవలసివుందని చిదంబరం అన్నారు. నిన్న జరిగిన బాంబు దాడి మీద తనకి ఢిల్లీ పోలీస్ కమిషనర్ పూర్తి వివరణనిచ్చారని ఆయన అన్నారు.

కోరెన్ వెళ్తున్న కారు ట్రాఫిక్ రెడ్ లైట్ దగ్గర ఆగివున్న సమయంలో వెనుకనుంచి వచ్చిన ఒంటరి మోటార్ సైకిలిస్ట్ ఆ బాంబుని కారు వెనక డోర్ కి అమర్చాడు. ఇదంతా సిసి కెమేరాల్లో రికార్డ్ అయింది. దాని సాయంతో చుట్టపక్కల పరిసరాల్లోని సిసి కెమేరాల్లో నిక్షిప్తమైన వీడియో ఫుటేజ్ ద్వారా దర్యాప్తు జరుగుతోందని చిదంబరం అన్నారు. విచారణ జరుగుతున్న సమయంలో ఏ సంస్థనీ ఏ వర్గాన్నీ ఆరోపణలకు గురిచెయ్యటం సరికాదని, కానీ ఈ ఘటనను పూర్తిగా ఖండిస్తున్నామని చిదంబరం అన్నారు.

-శ్రీజ