Supreme Court Verdict On 2g Solace To All Parties

Posted: 02/03/2012 01:11 PM IST

supreme-court నిన్న 2జీ కేసులో సుప్రీం కోర్టు ఇచ్చిన తీర్పు ఇరు పార్టీలనూ గెలిపించింది. పాలక ప్రతిపక్షాలు రెండిటికీ ఊరట కలిగించింది. బలిపశువుగా జైల్లో మగ్గుతున్న మాజీ టెలికాం మంత్రి ఎ.రాజా మీద సుప్రీం కోర్టు విరుచుకుపడటం, దానితో పాటు ప్రధాన మంత్రి, హోం మంత్రిని తప్పు పట్టకపోవటంతో కాంగ్రెస్ పార్టీకి ఊరట కలిగింది. కానీ 2008 తర్వాత రాజా హయాంలో ప్రభుత్వం ఇచ్చిన లైసెన్స్ లన్నిటినీ రద్దు చెయ్యటంతో ప్రతిపక్షాలకూ ఊరట కలిగింది. ఈ పని కేంద్ర ప్రభుత్వం అప్పుడే చేసుండాల్సింది. ఎందుకు చెయ్యలేకపోయిందన్నదానికి ప్రభుత్వం దగ్గర జవాబు లేదు. ఇది ప్రతిపక్షాలకు అనుకూలంగా ఉంది.

ఇలా సుప్రీం కోర్టు తీర్పు ఇరు పార్టీల వారికీ సమ్మతంగా ఉండటంమే కాకుండా, అవినీతి మీద ప్రతిఘటించేవారికి కూడా, ఈ తీర్పు ఓదార్పునిచ్చింది. లైసెన్స్ రద్దు చేసిన సంస్థల షేర్లు పడిపోయి, వారి వ్యాపారంలో నష్టం వచ్చి, వారు బ్యాంక్ లనుండి తీసుకున్న ఋణాలను తిరిగి కట్టలేక ఆర్థిక సంక్షోభం ఏర్పడుతుందన్నది నిజమేనేమో కానీ, ఈ దేశంలో డబ్బుతో ఏమైనా చెయ్యవచ్చు అనే స్వదేశీ విదేశీ సంస్థల ఆలోచనలకు ఆనకట్ట వేస్తుంది. భవిష్యత్తులో స్పెక్ట్రమ్ లాంటివే కాకుండా జాతి సంపదలను సహజవనరుల విషయంలో కూడా వేలం ద్వారానే కేటాయించాలని, అప్పుడే పారదర్శకత ఉంటుందని సుప్రీం కోర్టు భావించటం అవినీతిమార్గంలో అక్రమార్జన లక్ష్యంగా పనిచేసేవారికి గొడ్డలిపెట్టు.

ఈ తీర్పు రావటమైతే జరిగింది కానీ దీని ప్రభావం ఏమిటన్నది పరిశీలించాలని ఆర్థిక మంత్రి ప్రణబ్ ముఖర్జీ అంటున్నారు. చిదంబరం మీద వేటుపడకపోవటం ఆయనకి అసంతృప్తిని కలిగించిందని కొందరు విమర్శిస్తున్నారు.

-శ్రీజ