Posted: 02/03/2012 12:42 PM IST

ఉద్యోగ ధర్మంగా భావిస్తూ చట్టాన్ని అతిక్రమిస్తున్నవారిలో ఎక్కువగా పోలీసు, జైళ్ళ శాఖలోనే కనిపిస్తారు. నేరస్తుల చేత నిజం చెప్పింటం తమ విధి అన్న భావనలో నిందితులు విచారణ వరకూ వెళ్ళకముందే వాళ్ళు చేసారని పోలీసులు అనుకుంటున్న నేరాలకు వారు ముందుగానే శిక్షననుభవించిన ఉదంతాలు వెలుగులోకి వచ్చినవే ఎన్నో ఉన్నాయి. హింసకి పాల్పడేవారిని ప్రాణాలకు తెగించి కష్టపడి పట్టుకున్నా, చివరకు చట్టం లొసుగులను ఆసరాగా చేసుకుని పోలీసులను వెక్కిరించుకుంటూ బయటకు పోయి దర్జాగా బతుకుతున్నవారిని చూసి కసితో అలాంటివారిని ఎన్ కౌంటర్ పేరుతో చంపెయ్యటం కూడా అలాంటిదే. అలాగే కోర్టులో శిక్షపడి జైళ్ళల్లో ఉన్న ఖైదీలు మారుమాట్లాడకుండా చెప్పినమాట వినటం కోసం, పారిపోయే ఆలోచనే వారిలో రాకుండా ఉండటం కోసం వారిని చిత్రహింసల పాలుచేసినవారున్నారు.  కానీ అభేద్యమైన నాలుగు గోడల మధ్య జరిగే విషయాలన్నీ బయటకు ఎలా వస్తాయి.

కానీ, కంబోడియన్ ప్రజానీకానికి చేసిన ద్రోహంగా భావిస్తూ, ఖ్మేర్ రౌగ్ సుప్రీం కోర్టు, ప్రధాన జైలు అధికారికి అతను చేసిన ఘాతుకాలన్నీ బయటపడటంతో, అతని శేషజీవితమంతా జైలులోనే గడపమని ఆదేశించింది.  డోయిక్ అనబడే జైలు అధికారికి ఫ్నామ్ పెన్ లో యుఎన్ ఆధారిత కోర్టులో 35 సంవత్సరాల జైలు శిక్ష విధించటమైంది. వేలాదిమంది ఖైదీలను వారిని ఉరితీసేముందు వారిని చిత్రహింసకు గురిచేసిన పాపానికి ఒడిగట్టుకున్న డోయిక్ కి కింది కోర్టులో పడ్డ 19 సంవత్సరాల శిక్ష తక్కువేనని ప్రాసిక్యూటర్స్ కేసుని పై కోర్టులో వెయ్యగా, అక్కడ శిక్షాకాలాన్ని 35 సంవత్సరాలకు పెంచటం జరిగింది. అయితే సాంకేతికంగా లెక్కల్లో అది 11 సంవత్సరాలకు కుదించబడుతుంది.

12272 మందిని క్రూర మరణాలకు పాల్పడేట్టు చూసిన డోయిక్ కి కింది కోర్టులో విధించిన శిక్ష తక్కువేనని సుప్రీం కోర్టు భావించింది. అప్పీల్ లేని ఈ తీర్పుకి 69 సంవత్సరాల డోయిక్ జడ్జ్ కి మర్యాద పూర్వకంగా చేతులు జోడించి అంగీకరించాడు.

-శ్రీజ