Posted: 01/16/2012 04:33 PM IST

పాకిస్తాన్ ప్రధానమంత్రి యూసఫ్ రజా గిలానీకి పాకిస్తాన్ సుప్రీం కోర్టు కంటెమ్ట్ ఆఫ్ కోర్ట్ నోటీసిచ్చింది. అధ్యక్షుడు అసిఫ్ అలీ జర్దారీ మీదున్న అక్రమ ఆస్తుల కేసుని తిరిగితోడమని ఇచ్చిన ఆదేశాలనుల్లంఘినందువలన న్యాయస్థాన ఉల్లంఘన నోటీసిస్తూ, జనవరి 19 లోపులో సుప్రీం కోర్టులో హాజరవవలసిందిగా ఆదేశాలు పంపించింది. జస్టిస్ నాసిర్ ఉల్ ముల్క్ నేతృత్వంలో ఏడుగురు న్యాయమూర్తులతో కూడిన పాక్ అత్యున్నత న్యాయస్థానం ఉన్నత పదవుల్లో పెద్ద స్థాయిలో జరిగిన జర్దారీతోపాటు మరో 8000 మంది మీద పెట్టిన కుంభకోణాల కేసులను తిరిగి తీసి విచారించవలసిందిగా ఎపెక్స్ కోర్టు ఆదేశాలివ్వగా ఆ కేసులను పునర్విచారణ చెయ్యనందువలన సుప్రీం కోర్టు కంటెమ్ట్ ఆఫ్ కోర్టు నోటీసిస్తూ, గిలానీని స్వయంగా హాజరవమని కూడా ఆదేశమిచ్చింది.

లోగడ ఇచ్చిన ఆదేశాలను పాటించి కేసులను తిరగదోడవలసిందిగా సుప్రీం కోర్టు ఎన్నిసార్లు నోటీసులిచ్చినా ప్రభుత్వయంత్రాంగం ఆ పనిని విస్మరించిందని సుప్రీం కోర్టు అభియోగం. అసలే రక్షణ యంత్రాంగంతో ఉన్న పొరపచ్చలు మాపుకుందామని చూస్తున్న ప్రభుత్వానికి న్యాయస్థానం నుంచి కూడా ఎదురు దెబ్బ తగలడంతో దిక్కు తోచని పరిస్థితిలో ఉంది. ప్రభుత్వం అమెరికాకు రాసిన మెమో విషయంలో కూడా సుప్రీం కోర్టు దర్యాప్తు సంఘాన్ని నియమించింది. జర్దారీ కేసుని పునర్విచారణకు పంపని అటర్నీ జనరల్ ని కూడా సుప్రీం కోర్టు తప్పు పట్టింది.

అయితే, అటువంటి ఆదేశాలేమీ గతంలో సుప్రీం కోర్టునుంచి రాలేదని న్యాయశాఖలో ఉన్నత స్థానంలో ఉన్నవారు చెప్తున్నారు.

-శ్రీజ