Posted: 01/14/2012 11:56 AM IST

ఎయిర్ ఇండియా పైలట్లు ఈ రోజు విధులను బహిష్కరించటంతో ఎయిర్ ఇండియా విమాన సేవలలో అంతరాయం కలిగింది. 12 మంది పైలట్లు ఊకుమ్మడిగా సిక్ లీవ్ పెట్టటంతో నాగ్ పూర్, అహ్మదాబాద్, చెన్నై, లే, బెంగలూర్, బాగ్దోగ్రా, అమృత్ సర్, కోలకతా విమానసేవలు నిలిచిపోయాయి. పైలట్లకు చెల్లించవలసిన జీత భత్యాలు వారికి సకాలంలో అందకపోవటమే ఈ ఊకుమ్మడి సిక్ లీవ్ లకు కారణం. డబ్బులిస్తేనే పని అనే నినాదంతో యాజమాన్యం మీద ఒత్తిడి తెచ్చే ప్రయత్నంలో భాగంగా ఈ రోజు ఊకుమ్మడిగా విధులను బహిష్కరించాలని నిన్న పైలట్లు ఢిల్లీ, ముంబై, కోలకతా, చెన్నై లలో కలిసి మాట్లాడుకుని ఈ నిర్ణయానికి వచ్చారు.

పైలట్లు రావలసిన అలవెన్స్ లు గత ఆగస్ట్ నెల నుంచీ రాకపోవటంతో పైలట్లు ఆ బకాయిల కోసం ఒత్తిడి పెంచుతూ చేస్తున్న ఆందోళనలో భాగమే ఈ రోజు ఊకుమ్మడిగా ఆరోగ్యారీత్యా పెట్టిన శలవులు. ఇండియన్ కమర్షియల్ పైలట్స్ అసోసియేషన్ (ఐసిపిఏ) ఈ ఆందోళనలో భాగం వహించటం లేదు కానీ, పైలట్లకు రావలసిన అలవెన్స్ ల మంతనాలు జరిపి సమస్యను పరిష్కరించేట్టుగా చూస్తోంది. పైలట్లకు అందే అలవెన్స్ లు వారి జీతం లో 80 శాతం మొత్తానికి సమానం. అందుకే అంత పెద్ద మొత్తం 5 నెలలుగా రాకపోయేసరికి పైలట్లు విధిలేక విధులను బహిష్కరించేవరకూ వచ్చింది. వెంటనే విధుల్లోకి చేరమని, వారికి రావలసిన మొత్తం గురించి తాము యాజమాన్యంతో మాట్లాడుతున్నామని ఐసిపిఏ పైలట్లకు పిలుపునిచ్చింది కానీ పైలట్లు అందుకు సుముఖత చూపించటంలేదు.

-శ్రీజ