Posted: 12/27/2011 12:11 PM IST

విశ్వకవి రవీంద్రనాథ్ టాగోర్ రచించిన జనగణమన పాటకు ఈ రోజు 100 సంవత్సరాలు. మొట్టమొదటిసారిగా ఆయన తన గీతాన్ని తన సొంత బాణీలో 1911 లో డిసెంబరు 27న కాంగ్రెస్ సమావేశంలో ఆలపించారు. బెంగాలీలో రాసిన ఈ గీతంలోని మొదటి భాగాన్ని 1950లో భారత సార్వభౌమత్వం సిద్ధించిన తర్వాత జాతీయ గీతం హోదానిచ్చి గౌరవించారు. ఈ గీతంలోని పదాల కూడిక, తొణికిసలాడే దేశ భక్తి, మాతృభూమి మీది ప్రేమలతో కూడిన భావ గాంభీర్యం వలన మన దేశ జాతీయ గీతం అత్యుత్తమమైనదిగా యునెస్కో ప్రకటించింది. జాతీయ గీతాన్ని మొదటిసారిగా ఆలపించింది మన రాష్ట్రంలో మదనపల్లిలోనే. బెంగాలీ లో రాసిన గీతమైనా దేశంలోని అన్ని ప్రాంతవాసులకూ అర్థమయ్యే రీతిలో రాసిన రవీంద్రనాథ్ టాగోర్ ను కూడా దేశవాసులంతా ఎల్లకాలం గుర్తుంచుకుంటారు. 1910లో రవీంద్రనాథ్ టాగోర్ రాసిన గీతాంజలికి ఆయనకు 1913లో నోబెల్ పురస్కారం లభించింది. దాని ఇంగ్లీషు అనువాదాన్ని కూడా ఆయనే చేసారు.

జనగణమనకు 100 సంవత్సరాలు పూర్తయిన సందర్భంగా తిరుపతిలో 11 గంటల పాటు నిర్విరామంగా జాతీయ గీతాన్ని ఆలపిస్తూ చరిత్రను సృష్టించే ప్రయత్నం చేస్తున్నారు. ఇంతవరకూ ఉన్న రికార్డ్ కెనేడియన్ జాతీయ గీతాన్ని 607 సార్లు ఆలపించటం. ఇప్పుడు భారతదేశ జాతీయ గీతాన్ని 610 సార్లు పాడి ఆ రికార్డ్ ని అధిగమించటానికి ఈరోజు ఉదయం 7 గంటలకే తిరుపతిలో ఈ కార్యక్రమం మొదలైంది. ఇండియన్ బుక్ ఆఫ్ రికార్డ్స్ ప్రతినిధుల సమక్షంలో ఈ నిర్విరామ ఆలాపన సాగుతోంది.

-శ్రీజ