Posted: 12/24/2011 11:22 AM IST

మానవుల సాంఘిక వ్యవస్థ ఎంతగానో ఆలోచించి ప్రవేశపెట్టిందే.  పెళ్ళి, పిల్లలు కలగటంతో బాధ్యత అనేది ఉంటుంది, జీవితంలో సారం పోకుండా ఉంటుంది, కుటుంబాన్ని అభివృద్ధి చేయాలనే దిశగా వారికో లక్ష్యమంటూ ఏర్పడుతుంది కాబట్టి వారు సమాజాభివృద్ధికి కూడా తోడ్పడతారు కానీ సమాజవిద్రోహానికి పూనుకోరనే పెద్దలు అటువంటి సంస్కృతినిచ్చారు.  అయితే పెళ్ళి కానంత మాత్రాన వారు సమాజంలో చీడపురుగులుగా మారి, నాగరిక ప్రపంచాన్ని నివ్వెర పరచేలా అమానుష చర్యలకు పూనుకుంటారని కాదు. 

విశాఖపట్నంలో ఒక సీరియల్ కిల్లర్ చిన్నపిల్లలను ఎత్తుకుపోయి బావిలో పడేసి చంపేస్తున్న ఉదంతం పాత గోపాలపట్నం ప్రాంతంలో నివసిస్తున్నవారిని కొంతకాలంగా కలవరపరుస్తోంది.  దీనిమీద నిఘా వేసి పోలీసులు నిందితుడినైతే పట్టుకున్నారు కానీ అతని మీద ఎటువంటి కేసూ నమోదు చెయ్యకుండా శిక్ష పడేట్టుగా చెయ్యకుండా ఉండటంతో స్థానికులంతా మీడియాతో కలిసి పోలీస్ స్టేషన్ లో ఆందోళన చెయ్యగా తప్పని సరి పరిస్థితుల్లో ఆ నిందితుడిని పోలీసులు అందరి ముందుకీ తీసుకురావలసివచ్చింది. 

మీడియా ఉన్నదే వివరాలు తీసుకోవటానికి కదా, ఎందుకలా చేసావని అడిగితే, అందరికీ పెళ్ళవుతున్నది, నాకు మాత్రం కాలేదు.  ఆ బాధ తనని వేధిస్తున్నదని, అయినా అంతా తన తప్పు కాదు తను తాగే మద్యం చేసిన పని అని చెప్తున్నాడు.  పిల్లలను ఎత్తుకుపోయి చంపిన తర్వాత ఎంతగానో బాధపడేవాడట.  స్థానికులను అన్నదమ్ముల్లా భావించేవాడట.  కానీ మద్యం పడగానే తాను తానుగా ఉండేవాడు కాదట.  అదీ నేరస్తుడు అప్పారావు సంజాయిషీ.

ఉయ్యాలలోని పిల్లలు, నెలల పిల్లలనే లక్ష్యంగా పెట్టుకుని హతమార్చిన ఈ నరరూప రాక్షసుడు తప్పిదాన్ని తాగుడు మీదకు నెట్టేస్తున్నాడు.  తాగినప్పుడు నేను మనిషిని కాను అంటే, మరి ఆ సమయంలో బావిలో తనే దూకవచ్చు కదా, అలా ఎందుకు చెయ్యడు.  ఆ పని చేస్తున్నప్పుడు తనని ఎవరూ కనిపెట్టకుండా జాగ్రత్తపడటం తెలుసు, తనని తాను కాపాడుకోవటం తెలుసు కానీ తాను చేస్తున్నది అమానుష చర్య అని మాత్రమే తెలియదట. 

ఇతని వాలకం చూసి రెచ్చిపోయిన స్థానికులు, అతన్ని వదిలెయ్యండి మేము చూసుకుంటాం అని అన్నారు.  అది జరిగేది కాదు, ఆమోదయోగ్యం కాదు కాబట్టి నినాదాలతో వదిలేసారు.  అయితే అతన్ని కఠినంగా శిక్షించవలసిందేనంటూ మహిళా సంఘాలు పట్టుబట్టాయి. 

-శ్రీజ