Posted: 12/23/2011 03:49 PM IST

నిన్న పార్లమెంటులో లోక్ పాల్ ప్రవేశపెట్టిన తర్వాత చర్చల్లో ఆర్ జెడి పార్టీ అధ్యక్షుడు లల్లూ ప్రసాద్ యాదవ్ నుండి, సిపిఐ నాయకుడు గురుదాస్ దాస్ గుప్తా నుంచి అభ్యంతరాలు వెల్లువెత్తాయి.  దాస్ గుప్తా మాట్లాడుతూ దేశానికి ఒకరే జాతిపిత ఉన్నారు.  మేమంతా ప్రజాప్రతినిధులుగా పనిచేస్తుంటే ఇప్పుడొకాయన జాతిని ఉద్ధరించే జాతిపితగా అవతారమెత్తి తనే అవినీతినంతా కడిగేసే ఒకేఒక్క యోధుడిగా చెప్పుకుంటున్నాడు అంటూ అన్న హజారే పేరెత్తకుండా ఆయనని ఉద్దేశించి అనటంతో చాలామంది డెస్క్ ల మీద చేతులతో కొట్టారు.  అందులో యుపిఏ చైర్ పర్సన్ సోనియా గాంధీ కూడా ఉన్నారు.  ఈ సత్యాగ్రహాలకూ బెదిరింపులకూ వెరవకండి భారత దేశ సార్వభౌమత్వానికి తలవంపులు తేకండి అని దాస్ గుప్తా అన్నారు.

లల్లూ ప్రసాద్ యాదవ్ మాట్లాడుతూ పార్లమెంటులో చట్టాలు తయారు చెయ్యటానికి ప్రజాప్రతినిధులం మనమున్నాం.  ఎవరో ఏదో నిరాహార దీక్ష చేస్తానంటే చెయ్యనివ్వండి, అది ఆయన ఆరోగ్యానికి మేలు చేస్తుందేమో అంటూ, అయినా ఆయన తన వయసునీ ఆరోగ్యాన్ని చూసుకోవాలంటూ అన్నాకో సలహా కూడా పడేసారు.

ప్రభుత్వం ప్రతిపాదించిన లోక్ పాల్ బిల్లుతో పాటు అందులోని 97వ క్లాజ్ కి వివరణాత్మకంగా ఆర్థిక మంత్రి జతపరచిన మెమోరాండంలో లోక్ పాల్ వలన ప్రభుత్వానికి అదనంగా ఎంత ఖర్చు అవుతుందో లెక్కలు కట్టి చెప్పారు.  లోక్ పాల్ నిర్వహణకు మున్ముందుగా 100 కోట్ల రూపాయల ఖర్చు అవుతుందని, ఒకవేళ తమకంటూ ప్రత్యేకమైన భవనాలు కావాలనుకుంటే ఆ ఖర్చు 400 కోట్ల రూపాయలకు చేరవచ్చునని, అది కాకుండా సాలీనా 200 కోట్ల రూపాయల ఖర్చు అవుతుందని చెప్పారు.  అయితే వాటి వివరాలను ఇప్పుడే బయటకు తెలియజేయలేనని ప్రణబే ముఖర్జీ అన్నారు. 

ప్రభుత్వం అనవసరంగా భయపడుతూ అన్నా బెదిరింపులకు లొంగుతోందని అంటున్నవారిలో శివసేన, ఆర్ జె డి, సిపిఐ, బహుజన సమాజ్, అన్నా డిఎమ్ కే, బిజ్జూ జనతా దళ్ పార్టీలున్నాయి. 

-శ్రీజ