Posted: 12/13/2011 03:12 PM IST

తెలంగాణాలో అడుగుపెట్టినట్లయితే ప్రజలు తగిన విధంగా చంద్రబాబుకి బుద్ధి చెప్తారని తెలంగాణా రాజకీయ ఐకాస కన్వీనర్ ప్రొ.కోదండరామ్ తెదేపాకి హెచ్చరికతో కూడిన ప్రజా పిలుపునిచ్చారు.   తెలంగాణా కోసం రాజీనామాలను సమర్పించినవారంతా పార్టీతో సంబంధం లేకుండా తెలంగాణా కోసం పోరాడి గెలుస్తారని కోదండరామ్ నిన్న వరంగల్ లో మీడియా ప్రతినిధుల సమక్షంలో తెలియజేసారు.   తెలంగాణాలో తిరిగే హక్కు నైతికంగా కోల్పోయారని ఆయన తెదేపా అధ్యక్షుడు చంద్రబాబు గురించి చెప్పారు.  గతంలో కూడా తెలంగాణా ఉద్యమానికి ఈ విధమైన పిలుపు బాగా పనికివచ్చింది.  తెరాస తప్ప ఇతర పార్టీల నాయకులకు ముఖ్యంగా తెలంగాణా ద్రోహులని ముద్ర వేసిన నాయకులకు తెలంగాణా ప్రాంతంలో తిరగటానికి భయం కలిగించటంతో ఎన్నికల ప్రచార సమయంలో వారు చెప్పినదానికి ప్రతిగా మాట్లడే అవకాశం వేరెవరికీ లేకుండా పోయింది.  బాన్సువాడ ఉప ఎన్నికల సమయంలో ధైర్యం చేసి తెదేపా తెలంగాణా ఫోరం పోదలచుకున్నా, గొడవలు జరుగుతాయన్న భయంతో వాటిని ముందుగానే నిరోధించే ప్రయత్నంగా పోలీసులు వారిని అక్కడికి పోకుండా నిలిపివేసారు.  తెలంగాణా ప్రజలు అడుగు పెట్టనివ్వరు, తరిమి కొడతరు, బుద్ధి చెప్తరు, బొంద పెడతరు అనే మాటలు ఇటు ప్రజలను రెచ్చగొట్టటానికి, అటు ఇతర పార్టీ నాయకులలో భయోత్పాతం కలిగించటానికీ పనికి వస్తాయి.  ఏమైనా జరిగితే, చూసారా ముందే చెప్పినం కద, అని అనటానికీ పనికి వస్తుంది.  ఏది ఏమైనా పాశుపతాస్త్రంలా పనికి వచ్చే ఈ మాటలు ఇతర పార్టీలలో వణుకు పుట్టేట్టు చేసిందనటంలో అతిశయోక్తి లేదు.   మాటిమాటికీ ఈ విధంగా హెచ్చరికలు చెయ్యటం వలన, నేతల అండ మాకుందిలెమ్మన్న ధైర్యం కూడా ఉద్యమకారులలో పెరుగుతుంది.

-శ్రీజ