Posted: 12/10/2011 10:33 AM IST

మన రాష్ట్ర రాజకీయ వ్యవహారాలను చూసే గులామ్ నబీ ఆజాద్ ముఖ్యమంత్రి కిరణ్ కుమార్ రెడ్డిని, రాష్ట్ర పిసిసి అధ్యక్షుడు బొత్సా సత్యనారాయణను రమ్మని పిలవగా ముఖ్యమంత్రి ఇప్పటికే ఢిల్లీ చేరుకున్నారు.  రాష్ట్రపాలనేమో కానీ ప్రతి అంశానికీ ఢిల్లీ వెళ్ళి రావటం రాష్ట్ర నాయకులకు మొదట్లో తప్పని సరి అయి, ఇప్పుడు అలవాటయింది.  ఇదే బావుంది.  సొంత నిర్ణయం తీసుకుని తర్వాత ఇలా ఎందుకయింది, మీరేం చేస్తున్నారు లాంటి ప్రశ్నలను ఎదుర్కోవలసి రాకుండా ముందే ప్రతి విషయమూ ఢిల్లీలో చర్చిస్తే గొడవలేని పని.  పాలన అంటే పార్టీని బలోపేతం చేసుకోవటం, గద్దెను కాపాడుకోవటం వరకే పరిమితమైనట్టుగా ఉంది.   

తాజా పరిణామాల మీద ముఖాముఖి మాట్లాడి, పార్టీలో వెన్నుపోటు సభ్యుల మీద చర్యలు ఏ విధంగా తీసుకోవాలన్న సంగతి చర్చించుకోవటానికే ఈ భేటీ.  అవిశ్వాస తీర్మానం మొదలైన ఈ మధ్య జరిగిన పరిణామాల మీద, పార్టీలో కలిసివచ్చేవారు, ఎదురు తిరిగేవారు, తప్పించుకునేవారు, ఇలా అందరి సభ్యుల గురించీ నివేదికలు ఎప్పటికప్పుడు కేంద్రానికి చేరుతుంటాయి.  వాటిని ముఖ్యమంత్రి, బొత్సా విడివిడిగా ఆజాద్ కి నివేదికలను అందించారు.  వాటి మీద చర్చించి సముతిచ చర్యలు తీసుకునే దిశగా నిర్ణయాలు తీసుకోవటానికి ఈ రోజు వారిద్దరితో ఆజాద్ భేటీ విశేషాన్ని సంతరించుకుంటుంది.  ఎందుకంటే ఎవరెవరి మీద ఎటువంటి వేటు పడాలన్నది ఎన్నో కోణాలనుంచి చూడాల్సివస్తుంది. 

కాంగ్రెస్ పార్టీలో విలీనమై అవిశ్వాస ఘడియల్లో దన్నుగా నిలిచిన ప్రజారాజ్యం పార్టీ నాయకులకు సముచిత స్థానాన్ని కల్పిస్తామని ఆజాద్ ప్రకటించారు.  చిరంజీవిని కాంగ్రస్ పార్టీలో అంతర్భాగమని పేర్కొంటూ, ఆయన, ఆయన పార్టీవారి సేవలను తప్పక వినియోగించుకుంటామని, చిరంజీవిని సీనియర్ నాయకుడి స్థాయిలో పరిగణిస్తామని అన్నారు.  దానితో పాటే తెలంగాణా సమస్య మీద పరిష్కారానికి తగిన సమయం దగ్గరికొచ్చేసిందని కూడా ఆజాద్ ప్రకటించారు. 

-శ్రీజ