Posted: 11/30/2011 12:57 PM IST

ఏడవ రోజు కూడా పార్లమెంటు ఏ చర్చలూ సాగించకుండానే ఎటువంటి ప్రతిపాదనలు చెయ్యకుండానే మరోసారి వాయిదా పడింది. ఎఫ్ డి ఐ ని ఉపసంహరించుకోవాలని ప్రతిపక్షనేతలు చేస్తున్న ఆందోళనతో ఈ రోజు కూడా పార్లమెంటు వాయిదా పడింది. ఉదయం 11 గంటలకు మొదలైన పార్లమెంటు సమావేశాలు మొదలవుతూనే ఎఫ్ డి ఐ గొడవతో 12 గంటలకు, ఆ తర్వాత అదే అంశం సీరియల్లాగా కొనసాగటంతో సభాపతి మీరా కుమార్ రేపటికి వాయిదా వేసారు. కేంద్ర పాలిస్తున్న కాంగ్రెస్ ప్రభుత్వమే రాష్ట్రంలో కూడా పాలనలో ఉండటం వలన, రేపు ప్రారంభమౌతున్న శాసన సభలోని సన్నివేశానికి పార్లమెంటు లోని దృశ్యాలు ట్రయల్ పార్ట్ లా కనిపిస్తున్నాయి. ఇక్కడి సమావేశాల్లో ఎంతెంత ఆవేశాలు ఎదురు చూస్తున్నాయో అంచనా వేసుకోవటానికి పనికి వస్తున్నాయి.

ప్రత్యేక తెలంగాణా కోసం ఎంపీలు ప్లకార్డులతో లేచి నిలబడి నినాదాలు చెయ్యటం, తృణమూల్ కాంగ్రెస్, డిఎమ్ కే సభ్యులు ఎఫ్ డి ఐ వాపస్ లేలో అంటూ ప్లకార్డులను పట్టుకుని లేచి నిలబడి నిరసన తెలియజేయటం, తెదేపా, సిపిఎమ్, శివసేన సభ్యులు స్పీకర్ దగ్గర వెల్ లోకి వెళ్ళి గట్టిగా నినదించటంతో పార్లమెంటు సమావేశాలు ఏడవ రోజు కూడా వాయిదా పడ్డాయి. ఉభయ సభల్లోనూ పరిస్థితి ఇలాగే ఉండటంతో రేపటికి వాయిదా పడ్డ సమావేశాలు సజావుగా సాగాలంటే ప్రభుత్వానికి దిగిరాక తప్పని పరిస్థితి ఉంది.   ఈ శీతాకాల సమావేశాల్లో పెట్టుకున్న అజెండా సుసంపూర్ణమవాలంటే ప్రభుత్వం, ప్రతిపక్షాలు ఒక అవగాహనకు రాక తప్పదు. ఇప్పడు సడలిస్తే మరోసారి అవకాశం దొరకదని ప్రతిపక్షాలు, ఇలా ప్రతిదానికీలొంగితే లోకవవుతామేమోనని పాలకపక్షం పట్టుబట్టి కూర్చుంటే చట్ట సభలు కూడా చతికిలపడి కూర్చుంటాయి.

-శ్రీజ