Posted: 11/23/2011 10:42 AM IST

     తెలుగుదేశం పార్టీ అధ్యక్షుడు నారా చంద్రబాబు నాయుడు అక్రమ ఆస్తులను సంపాదించారని, చంద్రబాబు, అతని సన్నిహితుల ఆస్తులను దర్యాప్తు చెయ్యాలని పులివెందుల శాసన సభ్యురాలు వైయస్ విజయమ్మ దాఖలు చేసిన పిటిషన్ మీద హైకోర్టుని ఆశ్రయించగా హైకోర్టు మూడు నెలలో ప్రాధమిక విచారణను పూర్తి చేసి సీల్ చేసిన కవర్లో సమర్పించమని సిబిఐని ఆదేశించింది.  ఇదే ఫిర్యాదుని అంతకు ముందే ఇడికి కూడా సమర్పించారావిడ.  దానితో, రాష్ట్ర పోలీసులు, సిబిఐ, ఎన్ఫోర్స్ మెంట్ డైరెక్టరేట్ విడివిడిగా దర్యాప్తు చెయ్యవలసివుంది.  సిబిఐ దర్యాప్తులు ప్రారంభమయ్యాయి.  ఇడి కూడా తన వంతు దర్యాప్తులో భాగంగా చంద్రబాబు, ఆయన కుమారుడు లోకేశ్, ఎంపీ సుజనా చౌదరికి నిన్న నోటీసులు పంపించింది. 

     ఆ నోటీసుల ప్రకారం, ఎన్టిఆర్ మెమోరియల్ ట్రస్ట్ కి  మేనేజింగ్ ట్రస్టీగా వ్యవహరిస్తున్న చంద్రబాబు ట్రస్ట్ కి ఎప్పుడెప్పుడు ఎవరెవరి దగ్గర్నుంచి ఎంతెంత మొత్తం విరాళాల రూపంలో అందిందో లెక్క చెప్పవలసివుంది.  లోకేశే విషయంలో ఆయన విదేశాల్లో చదివిన చదువుకు ఎంత ఖర్చయింది, దాన్ని ఎవరు భరించారు చెప్పవలసివుంది.  ఎంపీ, పారిశ్రామికవేత్తయిన సుజనా చౌదరి మూడు సంవత్సరాల బ్యాలన్స్ షీట్ సమర్పించాల్సివుంది. వీరు స్వయంగా కానీ, తమ ప్రతినిధుల ద్వారా కానీ ఆ వివరాలను సమర్పిస్తే చాలు. 
వైయస్ విజయమ్మ వేసిన పిటిషన్ లో పేర్కొన్న వారిలో, చంద్రబాబు, లోకేశే, సుజనా చౌదరితో పాటు భువనేశ్వరి, రామోజీరావు, అహోబలరావు, నాగరాజు నాయుడు, నామా నాగేశ్వరరావు, మురళీ మోహన్, కె.వెంకటేశ్వరరావు, సిఎమ్ రమేష్ ల పేర్లున్నాయి. 

     ఈ దర్యాప్తుల మీద సుప్రీం కోర్టుకి వెళ్ళటానికి చంద్రబాబు సుముఖంగా లేరు.  లోగడ చేసిన ఆరోపణలే, అప్పుడు వీగిపోయిన కేసులే కాబట్టి ధీమాగానే వున్నారు.  కానీ పారిశ్రామిక వేత్తలు, వ్యాపారంలో ఉన్నవారయిన నామా నాగేశ్వరరావు, సీఎమ్ రమేష్, రామోజీరావు లు మాత్రం సుప్రీం కోర్టుని ఆశ్రయించారు.   వాటిమీద ఈరోజు సుప్రీం కోర్టులో విచారణ జరుగుతుంది.

శ్రీజ