‘సైరా’కు పవన్ కల్యాణ్ వాయిస్ ఓవర్

Posted: 08/19/2019 02:57 PM IST

Pawan kalyan voice over for mega star chiranjeevi s sye raa

మెగా అభిమానులు కొంతకాలంగా ఎదురుచూస్తున్న చిత్రం ‘సైరా’. కొణిదెల ప్రోడక్షన్స్ బ్యానర్ పై నిర్మితమవుతున్న ఈ చిత్రంపై ఇప్పటికే అంచనాలు పెరిగిపోయాయి. బాలీవుడ్ బిగ్ బి అమితాబ్ బచ్చన్, నయనతార సహా పలువురు ప్రముఖ నటులందరూ కలసి తొలిసారిగా నటిస్తుండటం కూడా అంచనాలు పెరగడానికి కారణంగా పేర్కోనవచ్చు. ఇప్పటికే ఈ చిత్రంలో రాంచరణ్ కూడా స్ర్కీన్ పై కనిపిస్తాడని సినీ వర్గాలు గుసగుసలాడుతున్న క్రమంలో ఈ చిత్రానికి మరింత హైప్ తీసుకువస్తున్నాడు పవర్ స్టార్ పవన్ కల్యాణ్.

సురేందర్ రెడ్డి దర్శకత్వంలో రూపోందుతున్న.. తన సోదరుడు చిరంజీవి నటిస్తున్న సైరా చిత్రానికి తానూ గొంతునందిస్తున్నాడు. అత్యంత ప్రతిష్టాత్మకంగా తొలితరం స్వతంత్ర సమరయోధుడి ఉయ్యాలవాడ నరసింహారెడ్డి జీవిత చరిత్ర ఆధారంగా రూపొందుతున్న ఈ చిత్రం చిరంజీవి కెరీర్ లోనూ 151వ చిత్రంగా ప్రాముఖ్యతను సంతరించుకుంది. 'సైరా' టీజర్ రేపు విడుదల కానుండగా, టీజర్ ప్రోమోను చిత్ర యూనిట్ కొద్దిసేపటి క్రితం విడుదల చేసింది.

ఈ సినిమాకు పవర్ స్టార్ పవన్ కల్యాణ్ వాయిస్ ఓవర్ ను అందిస్తున్న విషయం తెలిసినప్పటి నుంచి ఈ చిత్రంపై మరిన్ని అంచనాలు పెరిగిపోయాయి. అందుకు సంబంధించిన దృశ్యాలతో టీజర్ ప్రోమోను తయారు చేశారు. చిరంజీవితో కలిసి సినిమాను చూస్తూ పవన్ వాయిస్ ఓవర్ అందిస్తున్న సీన్స్ ఇందులో ఉన్నాయి. 'సైరా నరసింహారెడ్డి...' అని పవన్ ఆవేశంతో చెప్పడం కనిపిస్తుంది. ఈ టీజర్ మెగా అభిమానుల షేర్, లైకులతో ప్రస్తుతం నెట్టింట్లో ట్రెడింగ్ అవుతోంది.