జుట్టు సమస్యలకు ఇంటి చిట్కాలు

Posted: 07/17/2015 12:26 PM IST

The best homemade beauty remedies for hair problems

వయస్సు పెరుగుతున్నకొద్దీ ఆరోగ్యపరంగా మార్పులు వస్తుంటాయి కాబట్టి.. జుట్టుసంబంధిత సమస్యలు కూడా వస్తాయి. జుట్టు పల్చబడడం, పొడిబారిపోవడం, కాలక్రమంలో జుట్టు రాలిపోవడం వంటి సమస్యల్ని ఎదుర్కోవాల్సి వస్తుంది. హార్మోన్ల అసమతుల్యత, ప్రోటీన్ లోపం, వాతావరణ కాలుష్యం, ఇతర సాధారణ కారణాల వల్ల ఈ ప్రాబ్లమ్స్ ఎదురవుతాయి. ఇటువంటి సమస్యల్ని అధిగమించాలంటే.. కొన్ని ఇంటి చిట్కాలు పాటిస్తే చాలు. ఆరోగ్యకరమైన, కాంతివంతమైన జుట్టును సొంతం చేసుకోవచ్చు. మరి.. ఆ చిట్కాలేంటో తెలుసుకుందామా...

* కొబ్బరి నూనె : ఒక పాత్రలో కొబ్బరి నూనె (4 టేబుల్ స్పూన్స్), నిమ్మ రసం (2 టీస్పూన్లు) వేసి బాగా కలుపుకోవాలి. ఈ మిశ్రమాన్ని జుట్టుకు పట్టించి మసాజ్ చేసుకోవాలి. గంట తర్వాత జుట్టును మాత్రమే శుభ్రం చేసుకోవాలి. ఇలా క్రమం తప్పకుండా చేస్తే.. జుట్టు శుభ్రంగా మారడంతోపాటు పెరుగుదలకు సహాయపడుతుంది.

* అలోవెరా : ముందుగా తాజాగా వుండే అలొవెరా (కలబంద) జెల్ తలమీద వేసి బాగా రుద్దాలి. ఆ తర్వాత బాదం నూనె కొన్ని చుక్కల తలమీద వేసుకుని మసాజ్ చేసుకోవాలి. 30 నిముషాల తర్వాత తలస్నానం చేసుకోవాలి. ఇలా రెగ్యులర్ గా చేస్తే.. జుట్టు సమస్యలు తగ్గి, పెరుగుదల మెరుగవుతుంది.

* ఆముదం : ఒక పాత్రలో 1 టీ స్పూన్ తేనె, కొద్దిగా ఆముదము వేసి బాగా మిక్స్ చేయాలి. ఈ మిశ్రమాన్ని జుట్టుకు తగిలించి కొద్దిసేపు మసాజ్ చేసుకోవాలి. ఇలా చేసిన కాసేపు తర్వాత తలస్నానం చేసుకోవాలి. ఈ విధంగా రెగ్యులర్ గా చేస్తే.. జుట్టు రాలిపోవడం తగ్గి, పెరుగుదల మెరుగవుతుంది.

* ఆలివ్ ఆయిల్ : ఆలివ్ నూనెతో జుట్టుకు పట్టించి.. 10 నిముషాల వరకు మర్దన చేసుకోవాలి. ఇలా మర్దన చేసిన 8 గంటల తర్వాత తలస్నానం చేసుకోవాలి. ఈ విధంగా వారంలో మూడుసార్లు చేస్తే.. జుట్టులో వుండే మలినం పూర్తిగా తొలగించబడుతుంది. అలాగే.. జుట్టు నిర్మాణ అభివృద్ధి మెరుగవుతుంది.

* ఉల్లిపాయ : ఒక పాత్రలో కొద్దిగా ఉల్లిపాయ రసం, కాస్త తేనె వేసి బాగా మిక్స్ చేసుకోవాలి. ఈ మిశ్రమాన్ని జుట్టుకు పట్టించి.. కొద్దిసేపటివరకు మర్దన చేసుకోవాలి. తరువాత అది పూర్తిగా ఆరిన అనంతరం తలస్నానం చేయాలి. ఇలా 2 వారాలపాటు రోజు మార్చి రోజూ చేస్తే.. ఎన్నో ఫలితాలు పొందవచ్చు.