77 అడుగుల గణపతి-రెడ్డికి-తాకిన-కూరగాయల సెగ

Posted: 09/10/2013 06:33 PM IST

విశాఖలో సిద్ది వినాయక మహోత్సవాలు ఘనంగా ప్రారంభమయ్యాయి. నగరంలోని పలు ప్రాంతాల్లో గణపతి నవరాత్రులకు వివిధ భక్త కమిటీ భారీ విగ్రహాలను ఏర్పాటు చేశారు. గాజువాకలో 77 అడుగుల , దొండపర్తిలో 72 అడుగులు సత్యం జంక్షన్ లో 65 అడుగుల భారీ వినాయక విగ్రహాలను ఏర్పాటు చేశారు. ఉదయం నుంచి వినాయకులను దర్శించుకునేందుకు భక్తులు మండపాల వద్ద బారులు తీరారు. నగరంలోని అశీలు మెట్ట కూడలీ వద్ద ఉన్న సంపత్వినాయకనగర్ ఆలయంలో తెల్లవారుజామున 3 గంటల నుంచే భక్తులు ప్రత్యేక పూజల్లో పాల్గొన్నారు. నవరాత్రుల సందర్భంగా వినాయకుడిని రోజుకో రూపంలో అలంకరించనున్నారు.

 

రెడ్డికి సమైక్య సెగ

కాంగ్రెస్ పార్టీ రాజ్యసభ సభ్యుడు టి. సుబ్బిరామిరెడ్డికి నగరంలో సమైక్య సెగ తగిలింది. ఆంధ్రప్రదేశ్ విభజనపై కాంగ్రెస్ ప్రభుత్వం తీసుకున్న నిర్ణయాన్ని నిరసిస్తూ సుబ్బిరామిరెడ్డి తన పదవికి వెంటనే రాజీనామా చేయాలని సమైక్య వాదులు డిమాండ్ చేశారు. నగరంలో ఏర్పాటు చేసిన ఓ కార్యక్రమంలో పాల్గొనేందుకు వచ్చిన ఆయనను సమైక్యవాదులు అడ్డుకున్నారు. అందులోభాగంగా వేదికపై ఆయన ప్రసంగించేందుకు యత్నించగా,సమైక్యవాదులు అడ్డుకున్నారు. దాంతో సుబ్బిరామిరెడ్డి మిన్నకుండి పోయారు.

 

కూరగాయల హోరు

రాష్ట్ర విభజనను వ్యతిరేకిస్తూ సీమాంధ్ర జిల్లాలో ఆందోళనలు 42వ రోజుకు చేరుకున్నాయి. ఉదయం జిల్లాలో రైతులు సమైక్యాంధ్రకు మద్దతుగా రైతు బజార్ల బంద్‌కు పిలుపు నిచ్చారు. కూరగాయలతో నిరసన వ్యక్తం చేస్తున్నారు.