వైఎస్‌ఆర్‌ పార్కు పై ద్రుష్టి?

Posted: 05/27/2013 07:02 PM IST

నగరం నడిబొడ్డున ఉన్న వైఎస్‌ఆర్‌ పార్కును సర్వాంగ సుందరంగా తీర్చిదిద్దేందుకు వుడా ప్రణాళిక సిద్ధం చేసింది. పాత జైలు స్థలం 30 ఎకరాలుకాగా రోడ్లకోసం ఐదెకరాలు పోయింది. ప్రభుత్వ మహిళా జూనియర్‌ కళాశాలకు 3 ఎకరాలు ఇచ్చారు. మిగతా 22 ఎకరాల్లో పార్కును సిద్ధం చేస్తున్నారు. పార్కు చుట్టూ సర్వీసు రోడ్డును ఇప్పటికే అభివృద్ధి చేశారు. పార్కులోపల నాలుగు మూలలా వాహనాల పార్కింగ్‌ కోసం ఏర్పాటుచేయాలని నిర్ణయించారు. అయితే లోపల పార్కింగ్‌లో 200 వరకూ కార్లు మాత్రమే పట్టే అవకాశముంది. దీంతో సర్వీసు రోడ్డును కూడా పార్కింగ్‌ కోసం ఉపయోగించొచ్చని వుడా భావిస్తోంది. పార్కులో పచ్చదనానికి అధిక ప్రాధాన్యత ఇవ్వాలని నిర్ణయించారు.

 

కైలాసగిరి జాగింగ్‌ ట్రాక్‌ సిద్ధమైందని, దీన్ని త్వరలోనే ప్రారంభించనున్నామని వుడా వైస్‌ ఛైర్మన్‌ డాక్టర్‌ ఎన్‌.యువరాజ్‌ చెప్పారు. హరిత ప్రాజెక్టుకు సంబంధించి పది ప్యాకేజీలకుగానూ మూడు ప్యాకేజీలకు టెండర్లు ఖరారుచేశారు. మిగతా ఏడు ప్యాకేజీలకు సింగిల్‌ టెండర్లు రావడంతో తిరిగి టెండర్లు పిలిచినట్టు విసి చెప్పారు. ఏడు ప్యాకేజీలకు సంబంధించి టెండర్లు దాఖలుచేయడానికి ఈ నెల 27 చివరితేదీ. టెండర్లు ఖరారుకాగానే పనులు వెంటనే ప్రారంభిస్తామని తెలిపారు.