దాడి తీరుపై పార్టీ వర్గాల ఆగ్రహం

Posted: 05/03/2013 06:45 PM IST

Ap telugu political tdp leaders fire on dadi veerabhadra rao

పార్టీలో కీలక పదవులు ఇవ్వనున్నట్టు తెలుగుదేశం పార్టీ అద్యక్షుడు చంద్రబాబు నాయుడు హామీ ఇచ్చినా పదవీ కాంక్షతో పార్టీని వీడడం నమ్మక ద్రోహంగా అభివర్ణిస్తున్నాయి. గతంలో పార్టీని వీడి ఇతర పార్టీల్లోకి గెంతిన వారు గతిలేక తిరిగి పార్టీ గూటికి చేరినా అక్కున చేర్చుకున్న పార్టీ తెలుగుదేశం ఒక్కటేనని తెలియచేస్తున్నాయి. ఏ ఒక్కరో పార్టీని వీడితే పెద్దగా నష్టం ఉండదని, రానున్న 2014 లో తెలుగుదేశం పార్టీ అధికారంలోకి వచ్చి తీరుతుందన్నాయి.తెలుగుదేశం పార్టీ తనకు మరోమారు ఎమ్మెల్సీ పదవి ఇవ్వలేదన్న కారణంగా రాజకీయ భిక్ష పెట్టిన పార్టీకి వెన్నుపోటు పొడవడం దాడి వీరభద్రరావు కే చెల్లిందని తెలుగుదేశం పార్టీ వర్గాలు అభిప్రాయ పడుతున్నాయి. తెలుగుదేశం పార్టీలో మూడు దశాబ్దాల పాటు అత్యున్నత హోదాలు కల్పించి, ఈ పర్యాయం వేరోకరికి అవకాశం కల్పించడాన్ని జీర్ణించుకోలేని దాడి ది కేవలం అవకాశ వాదమని ఆగ్రహాన్ని వ్యక్తం చేస్తున్నాయి.

అన్ని వేళలా ఒకరికే పదవులు ఇవ్వాలంటే సాధ్యపడదని, ఉత్తరాంధ్రా జిల్లాలైన విశాఖపట్నం, విజయనగరం, శ్రీకాకుళం జిల్లాల్లో తెలుగుదేశం పార్టీకి దాడి కంటే ఎనలేని సేవలు చేసిన వారున్నారని, వారు ఏనాడూ పదవులు ఆశించి పనిచేయలేదని, దశాబ్దాల తరబడి పార్టీ జెండాలు మోసిన వారిలో వేలాది మందికి ఏనాడూ ఒక్క పదవి కూడా లభించలేదని తెలియచేసాయి. పార్టీ అధికారం లో లేనప్పటికీ దాడికి అధికార హోదాలోని ప్రభుత్వ పదవులు వరించాయని, మూడు దశాబ్దాల కాలంలో పదవులు లేకుండా ఏనాడు దాడి ఖాళీగా లేరన్న విషయాన్ని తెలియచేసాయి.

దాడి జిల్లాలో కంటే హైదరాబాద్‌ లోనే ఎక్కువ కాలం ఉన్నారని, వీరి సేవలు జిల్లా కార్యకర్తలకు ఏ విధంగా ఉపయోగపడ్డాయో దాడి వివరించాల్సిన అవసరం ఉందని ప్రశ్నిస్తున్నాయి. ఇప్పటికే దాడి కాంగ్రెస్‌ పార్టీ ప్రతినిధులను కలవడం జరిగిందని, దీనికి నిదర్శనమే వస్తున్నా మీకోసం పాదయాత్ర విశాఖ జిల్లాలో కొనసాగుతుండగా, దాడి రాష్ట్ర ఓడరేవుల శాఖామంత్రి గంటా శ్రీనివాసరావును కలవడమేనని తెలిపాయి. ప్రస్తుతం వైఎస్‌ఆర్‌ కాంగ్రెస్‌ పార్టీలో చేరతారన్న వార్తలూ వినిపిస్తున్నాయని తెలియచేస్తున్నాయి. ఏ పార్టీ కూడా దాడికి ప్రాధాన్యత కల్గిన పదవులు ఇవ్వదని తెలిపాయి.