Posted: 05/03/2013 06:02 PM IST

అధిష్టానం నమ్మితే పార్టీ కోసం ప్రాణాలైనా ఇస్తామని, నమ్మకం లేకపోతే ఏమీ చేయలేమని దాడి వివరించారు. తెలుగుదేశం పార్టీ ఆశయాలకు అనుగుణంగానే శాసనమండలిలో వ్యవహరించానని, తన కుమారుడు చంద్రబాబు వెంట పాదయాత్రలో నడిచారని, ఆయనను పట్టించుకోలేదని దాడి వీరభద్రరావు ఆరోపించారు. తాము ఏ తప్పు చేశామని ఆయన ప్రశ్నించారు. గత కొద్ది కాలంగా పార్టీకి దూరంగా ఉన్న టీడీపీ నేత దాడి వీరభద్రరావు మీడియా ముందుకు వచ్చారు. తనను పాదయాత్రలో దూరంగా పెట్టారని, తనను చూస్తేనే అసహ్యించుకుంటున్నారని తెలిసి దూరంగా ఉన్నట్లు ఆయన తెలిపారు. 30 ఏళ్లుగా పనిచేసిన పార్టీని వీడుతుంటే కుటుంబసభ్యులు కన్నీరు పెట్టుకున్నారని దాడి ఆవేదన వ్యక్తం చేశారు. పార్టీని వీడే నిర్ణయం తీసుకున్నందకు తనకు బాధగా ఉందని ఆయన పేర్కొన్నారు.కాంగ్రెస్ పార్టీలోకి వెళ్లే ప్రసక్తే లేదని, ఏకనాయకత్వానికి అలవాటు పడ్డామని దాడి వీరభద్రరావు పేర్కొన్నారు. తనను పలు రాజకీయ పార్టీలు ఆహ్వానిస్తున్నాయని ఆయన తెలిపారు. యాంటీ కాంగ్రెస్ పార్టీగా ఉన్న వైఎస్సార్ కాంగ్రెస్ పార్టీలో చేరితే బాగుంటుందన్న ఆలోచనలో ఉన్నట్లు చెప్పారు. రేపు చంచల్‌గూడ జైల్లో ఉన్న జగన్‌ను ములాఖత్ సమయంలో భేటీ అవుతున్నట్లు దాడి చెప్పారు. తమకు ఏవిధంగా ప్రాధాన్యత ఇస్తారో, పార్టీ విధి విధానాలపై చర్చించనున్నట్లు తెలిపారు. జగన్ సమాధానాలు సంతృప్తికరంగా ఉంటే తుది నిర్ణయాన్ని ప్రకటిస్తానని, జగన్ జవాబులు సంతృప్తినివ్వకపోతే రాజకీయాల నుంచి తప్పుకుంటానని దాడి ప్రకటించారు.