గోసేవలో నేటి యువత?

Posted: 04/23/2013 11:25 AM IST

ఇంటికో ఇంజినీర్ ఉన్న రోజులివి... డాక్టర్లు, లాయర్లు, చార్టెడ్ అకౌంటెంట్లు ఇలా వివిధ రంగాల వైపు చూస్తున్న ప్రస్తుత తరుణంలో వ్యవసాయం, పాడి పరిశ్రమపై కూడా కొందరు యువకులు మొగ్గుచూపు తుండడం విశేషం. తనను నమ్ముకున్న వారిని గోమాత కరుణించి అక్కున చేర్చుకుంటోంది. నిత్యం గోసేవలో తరిస్తున్న ఈ యువ రైతులు మంచి ఆదాయంతో లాభాల బాట పడుతున్నారు. పెందుర్తి మండలం రాంపురానికి చెందిన రెడ్డి అర్జునరావు గత ఏడాది జిల్లా ఉత్తమ పాడి రైతుగా ఎంపిక కావడం ఈ రంగానికి మరింత ఉత్సాహాన్నిచ్చింది. మండలంలో ప్రస్తుతం 5 మినీ, ఒక మధ్యతరహా డెయిరీలున్నాయి. వీటి ద్వారా రోజుకు సుమారు 1500 లీటర్ల పాల ఉత్పత్తి జరుగుతోంది. మినీ డెయిరీల ఏర్పాటుకు ముందుకు వచ్చే వారికి సబ్సిడీ ద్వారా పశువులను అందిస్తామంటున్నారు పశు సంవర్థక శాఖ అధికారులు. రాష్ట్రీయ కృషి వికాస యోజన పథకంలో రెండు పశువుల యూనిట్‌కు రూ.70 వేలు, మినీ డెయిరీలకు (5 నుంచి పది పశువులు) రూ.70 వేల నుంచి రూ.లక్ష వరకూ, మధ్యతరహా డెయిరీ (20 పశువులు)కి రూ.2.5 లక్షల సబ్సిడీ అందిస్తున్నారు. వీటితో పాటు గొర్రెలు, మేకల పెంపకానికి కూడా 25 శాతం, పశువుల మేతకు అవసరమయ్యే గడ్డి పెంపకానికి యూనిట్‌కు రూ.60 శాతం వరకూ, పాలు పితికే యంత్రా (మిల్కింగ్ మెషీన్)నికి దాదాపు 50 శాతం సబ్సిడీతో రుణాలు మంజూరు చేస్తున్నారు.