Posted: 03/15/2013 08:05 PM IST

మాజీమంత్రి, కాంగ్రెస్ పార్టీ సీనియర్ నాయకుడు బలిరెడ్డి సత్యారావు త్వరలోనే వైఎస్ఆర్ కాంగ్రెస్ పార్టీ తీర్థం తీసుకొనే అవకాశం ఉంది. పార్టీ సమన్వయకర్తల నియామకం కోసం వైకాపా స్థానిక నేతల నుంచి పెరుగుతున్న ఒత్తిళ్ల నేపథ్యంలో వీలైనంత త్వరగా బలిరెడ్డికి పార్టీ తీర్థం ఇప్పించేందుకు ఆ పార్టీనేతలు ప్రయత్నాలు చేస్తున్నట్టు సమాచారం. వారం రోజుల వ్యవధిలో బలిరెడ్డి వైకాపా తీర్థం పుచ్చుకునే అవకాశాలు ఉన్నట్టు ఆయన వర్గీయులు అంటున్నారు. వాస్తవానికి వచ్చే నెల ఉగాది తర్వాత మంచి ముహూర్తం నిర్ణయించి జిల్లాకేంద్రంలోగాని, చోడవరంలోగాని బహిరంగ సభ ఏర్పాటుచేసి, తన వర్గీయులతో ఆ పార్టీ రాష్ట్ర నేతల సమక్షంలో వైకాపాలో చేరాలని భావించారు. అయితే బలిరెడ్డి సత్యారావుతో మంత్రి గంటా మాట్లాడారని, ఆయన పార్టీ మారే అవకాశం లేదని, కాంగ్రెస్‌లోనే ఉంటారని కొందరు ప్రచారం చేశారు. ఈ నేపథ్యంలో జిల్లాలోని అన్ని నియోజకవర్గాలకు సమన్వయకర్తలను నియమించిన వైకాపా అధిష్ఠానం, చోడవరం నియోజకవర్గాన్ని పెండింగ్‌లో ఉంచింది. బలిరెడ్డి కోసమే ప్రకటన వాయిదా పడినట్టు ప్రచారం జరుగుతున్నా, ఇదే సమయంలో తమనే సమన్వయకర్తలుగా నియమించాలంటూ పార్టీలో నేతలు అధిష్ఠానంపై ఒత్తిడి పెంచడంతో ఈ సమస్యను వెంటనే పరిష్కారించాలనే నిర్ణయానికి వైకాపా నేతలు అంటున్నారు. బలిరెడ్డి చేరేవరకూ సమన్వయకర్తల నియామకం పెండింగ్‌లో పెడితే, గ్రూపులు పెరిగి వివాదాలు రేగే అవకాశం ఉన్నందున ఆయన చేరిక తంతును వెంటనే ముగించాలన్న భావనకు పార్టీ అధినేతలు వచ్చినట్టు తెలుస్తున్నది. బలిరెడ్డికి సమన్వయకర్తగా ప్రకటిస్తే తమ సంగతి ఏమిటంటూ ఇప్పటికే కొందరు నేతలు అధిష్ఠానం ఎదుట నిరసనను తెలిపినట్టు సమాచారం. ఈ నేపథ్యంలో బలిరెడ్డి వైకాపా ప్రవేశం ముందుకు వచ్చిందని చెబుతున్నారు.